Gjykata e Shkallës së Parë e Juridiksionit të Përgjithshëm në Kukës ka caktuar masën e sigurisë “arrest në burg” për dy shtetas nga Prizreni, Shkëlqim Qenaj dhe Avdulla Mallaki, të akuzuar për trafik të armëve nga Kosova drejt territorit shqiptar.
Dy të dyshuarit u arrestuan më 4 korrik në zonën e njohur si “Ura e Hasit”, pranë kufirit të gjelbër, gjatë një operacioni të Policisë së Kukësit.
Gjatë kontrollit në automjetin e tyre, u sekuestruan tetë armë zjarri, të ndara në disa çanta në bagazhin e makinës.
Sipas hetimeve paraprake, armët dyshohet se do t’i dorëzoheshin dy personave të tjerë në territorin shqiptar, të cilët u larguan me shpejtësi sapo vunë re forcat e rendit. Ata vijojnë të jenë në kërkim nga autoritetet.
Më herët, më 30 maj, një operacion pesëmujor i Policisë së Shtetit çoi në arrestimin e 10 personave të tjerë, të përfshirë në të njëjtën veprimtari kriminale.
Hetimet vijojnë për të zbuluar lidhje të tjera të mundshme në rrjetin e trafikut të armëve.
