Tonin Marinaj, kryetari i Bashkisë së Malësisë së Madhe, ka reaguar pas kërkesës së Partisë Demokratike për verifikim të figurës së tij sipas ligjit të dekriminalizimit. Në një reagim të gjatë drejtuar banorëve të Malësisë së Madhe, Marinaj hodhi poshtë akuzat, duke i quajtur ato shpifje dhe një skenar të dobët politik.
“Sot, si shumica nga ju, edhe unë jam surprizuar nga një deklaratë nga zyrat e njërës prej PD-ve të shumta në qarkullim,” tha Marinaj, duke nënvizuar se këto sulme kanë për qëllim të ndotin figurën e tij dhe institucionin që ai drejton. Ai theksoi se akuzat janë pjesë e një skenari të dobët politik, për të cilin, sipas tij, qëllimi i vetëm është të dëmtojnë reputacionin e tij dhe të Bashkisë së Malësisë së Madhe.
Marinaj theksoi se është votëbesuar tre herë radhazi nga banorët e Malësisë së Madhe dhe se do të vazhdojë të punojë me përkushtim për komunitetin e tij. “Ju jam mirënjohës për mbështetjen e qëndrueshme këto vite, të cilën me mundësitë dhe aftësitë e mia, me mbështetjen e jashtëzakonshme të qeverisë dhe kryeministrit Edi Rama, jam përpjekur dhe do të vazhdoj të përpiqem t’ua kthej me punë të mira,” shtoi ai.
Në vijim të deklaratës, Marinaj shprehu hapjen e tij përballë çdo institucioni hetimor, duke përfshirë KQZ, prokurorinë, KLSH-në, SPAK-un apo çdo organizëm tjetër vendas dhe i huaj, për të shqyrtuar çdo informacion në drejtim të tij. “Ofroj bashkëpunimin tim maksimal për t’i lehtësuar punën me një synim të vetëm: Të gjitha të vërtetat të dalin në shesh dhe t’i mbyllet goja e shthurur e shpifjes çdo personi,” deklaroi Marinaj.
Ai përfundoi duke siguruar banorët e Malësisë së Madhe se vitin që vjen, me votën e tyre, do të japin përgjigjen e merituar ndaj atyre që përhapin shpifje. “Me respektin dhe përkushtimin maksimal për ju, si deri më sot dhe gjithmonë,” përfundoi Marinaj, duke garantuar se do të vazhdojë të punojë për të mirën e komunitetit të tij.
