Kandidatja për deputete e koalicionit opozitar, Mesila Doda ka thënë se kryetari i Partisë Social-Demokrate, Tom Doshi është duke ofruar shuma marramendëse në këmbim të votës. Në një intervistë për Fax Neës, Doda u shpreh se e ka këtë lloj informacioni nga terreni, por janë organet e drejtësisë ato që duhet të gjejnë prova. Emri i Tom Doshit ka qenë shumë i lakuar nga Ambasada Amerikane për shkak të ndalimit që atij i është bërë për të hyrë në Amerikë, si pasojë e problemeve me drejtësinë.
“…E kanë mbajtur shqiptarët për 8 vite me radhë shqiptarët këtë pandemi vjedhjesh, janë parti më të vogla pranë PS-së dhe shkojnë me premtime për blerje votash. SPAK duhet të zgjohet, pasi nesër do të duhet të mbajë përgjegjësi për mosveprimet. Ne në terren e kemi këtë lloj informacioni, provat duhet ti gjejnë organet e drejtësisë, ndaj do të duhet që të gjithë të bëjnë punën e tyre. Derisa na kanë ardhur ne fakte që jepen shifra marramendëse për blerjen e votave, atëherë drejtësia duhet ti gjejë”, ka thënë Doda.
Kandidatja e Tiranës ka bërë gjithashtu thirrje që qytetarët të dalin në votime në 25 prill, pasi nga kjo varet e ardhmja.
“Ka pasur raste që kanë pasur me vete policinë dhe ushtrinë dhe nuk ja kanë dalë dot që të mbajnë Shqipërinë në robëri, si në kohën e Ramiz Alisë. U lutem qytetarëve që në datën 25 Prill të dalin sa më shumë të për votuar, për të ardhmen e fëmijëve tuaj, dilni sa më shumë të votoni, detyra jonë është që të ndryshojmë dhe të sjellim një Shqipëri normale.
Absolutisht po, ne jemi në të gjitha qarqet, ne nuk kemi bërë fushatën e madhe si gjithmonë, që të mbushnim sheshet, kemi gjykuar se është me shumë rëndësi që të takojmë njerëzit kokë më kokë, kudo në çdo zonë, dhe të kemi mundësi të sjellim vota për koalicionin opozitar”, tha Doda.
