Kreu i Partisë Social Demokrate, Tom Doshi, është paraqitur këtë të hënë në Prokurorinë e Posaçme, ku është parë i pashoqëruar dhe me një buzëqeshje ndërsa hyri në ambientet e këtij institucioni. Pas vizitës, ai dha një prononcim të shkurtër për mediat, duke shpjeguar se kishte shkuar në SPAK për çështjen e zgjedhjeve në Rrogozhinë.
“Kam pasur një takim në lidhje me zgjedhjet në Rrogozhinë dhe personi që kam takuar ishte nën përgjim,” tha Doshi.
I pyetur për lidhjen e tij me çështje të pastrimit të parave, ai e mohoi këtë dhe për shkrirjen e SPAK-ut, theksoi se nuk ishte dakord dhe do të vazhdonte ta mbështeste këtë institucion të drejtësisë.
“E kam mbështetur reformën në drejtësi dhe do të vazhdojmë ta mbështesim SPAK,” u shpreh ai, duke shtuar se ishte normale që prokuroria të thërriste për t’u marrë me çështje të tilla.
