Tokio e ka thyer sërish rekordin e rasteve të reja ditore me koronavirus, për të dytën ditë me radhë. Kryeqyteti japonez ka raportuar 5042 raste, në një shqetësim në rritje që prej fillimit të Olimpiadës.
Rastet shtesë të shpallura të enjten e çuan totalin në Tokio në 236,138. Në shkallë vendi, Japonia deri më tani ka regjistruar gjithsej 980,728 raste dhe 15,247 vdekje. Sipas Al Jazeera, situata në kryqytet po përshkallëzohet shpejt dhe ka një ndjenjë në rritje frustrimi mes shumë njerëzve, ndërkohë që fushata e vaksinimit po ecën ngadalë.
Tokio ka qenë nën një gjendje të jashtëzakonshme që nga mesi i korrikut, dhe katër zona të tjera janë shtuar dhe zgjatur deri më 31 gusht. Por masat, në thelb ndalimi i alkoolit në restorante dhe bare dheshkurtimi i orareve të tyre, po injorohen gjithnjë e më shumë nga publiku, i cili është lodhur nga kufizimet.
Gjendja e jashtëzakonshme në vetvete është disi e pazbatueshme sepse nuk është ligj apo urdhër. Ashtë një kërkesë që njerëzit ndoshta të qëndrojnë në shtëpi, të punojnë nga shtëpia nëse munden, raporton Al Jazeera.
Kryeministri Yoshihide Suga ka mohuar se Olimpiada ka shkaktuar një rritje të infeksioneve. Të alarmuar nga ritmi i përhapjes, disa ekspertë kanë bërë thirrje që gjendja aktuale e jashtëzakonshme në Tokio dhe pesë zona të tjera të zgjerohet në shkallë vendi.
