Mungesa e hapësirës së mjaftueshme për varret, ka bërë që banorët e një fshati të Fierit të konfliktohen me ato të Vlorës.
Banorët e Novoselës po varrosin të afërmit e tyre në vendprehjet e fshatit Ferras në Fier, pasi në këtë zonë nuk ka hapësirë për varre. Ky veprim është kundërshtuar nga banorët fshatit Ferras të cilët protestuan këtë të hënë duke i kërkuar kryebashkiakut të Vlorës të marrë masa në lidhje më këtë çështje.
Ata kërkojnë ndërhyrjen e bashkisë dhe policisë për të mos lejuar një gjë të tillë, ndërsa i bëjnë thirrje kryebashkiakut të Vlorës të krijojë hapësira që banorët e Novoselës dhe fshatrave të tjera të varrosin të afërmit e tyre pranë zonave ku jetojnë.
Banorët e fshatit Ferras kanë protestuar pranë varrezave të fshatit, pasi kundërshtojnë zaptimin e tokës së vendprehjeve në fshatin e tyre.
Protestuesit e Ferrasit, shprehen për “Syri.net” se banorë të fshatrave të Vlorës po sjellin të afërmit e tyre për t`i varrosur në varret e fshatit Ferras.
Kujtojmë se problematika e mungesës së hapësirë për t’u prehur personat që ndërrojnë jetë nuk është vetëm për Fierin, pasi para një viti edhe Durresi u përball me një”krizë” hapëzirë për varret.
Në legjislacion thuhet se: Çdo projekt varreze duhet të ketë, në përbërjen e vet, strukturën e mëposhtme, me elementet përkatëse, lexueshmëria e të cilëve duhet të jetë e qartë. Në territorin e varrezave nuk lejohen të bëhen ndërtime të llojeve të ndryshme, me përjashtim të atyre që janë në shërbim të varrezave. Hapësira e varrezave duhet të jetë e rrethuar me mur kufizues, ose rrethim tjetër të përshtatshëm, lartësia e të cilit nuk duhet të jetë më e vogël se 2,5m. Struktura e rrethimit mund të jetë pjesërisht opake, pjesërisht transparente, duke përdorur kangjella metalike me/pa gjelbërim. Perimetri rrethues mund të jetë i realizuar edhe me anë të varrezave murale, për varrosjen e eshtrave, kufomave dhe/ose hirit”.
