LIBAN
Rima Majed, e mbijetuar nga shpërthimi i madh që ndodhi në portin e Bjerutit më datë 4 gusht 2020, ka rrëfyer të gjithë eksperiencën e hidhur që kaloi në ato momente.
“Po takoja miqtë e mi në një kafe në lagjen Hamra, kur papritur toka nisi të tundet nën këmbët tona. Dikush nga ne bërtiti ‘tërmet’, Por shoku im që ka përjetuar periudhën e luftës civile në Liban nga viti 1975 deri më 1990 tha se ishte shpërthim.
Përpara se të merrja veten për atë që po ndodhte, pasoi edhe një shpërthim i dytë. Ky ishte edhe më i fuqishëm se i pari. Ndërtesat po shkatërroheshin nga shpërthimi dhe qelqet po binin në tokë, po ashtu”, tha Majedpër CNN.
Po ashtu, Majed ka thënë se ngjarja nuk ka ndodhur rastësisht, por se në atë vend ka kohë ka një korrupsion masiv dhe se Libani vuan nga kapitalizmi i egër politik.
“Megjithëse pata fatin të shpëtoja nga shpërthimet pa shumë prerje apo mavijosje, mikja ime në kafene e pësoi rëndë. Xhami i thyer ra mbi të, duke hapur një plagë në këmbën e saj, gjaku po i rridhte shumë dhe duhej t’i nënshtrohej një mjekimi të menjëhershëm”, rrëfen ajo.
Majed thotë se më pas morën një taksi, ndërsa ka parë atë ditë se spitalet ishin plot me njerëz dhe se dëmtimet ishin jashtëzakonisht të mëdha e nuk bëhej fjalë për ndonjë lagje, por për një qytet të tërë të prekur nga shpërthimi.
Shpërthimi i fuqishëm ka vrarë afër 200 persona, ka plagosur më shumë se 6000 të tjerë dhe ka lënë pa banesa rreth 300 mijë njerëz. Majed akuzon klasën politike për ngjarjen dhe realitetin në Liban. Ajo shprehet se uron që një ditë në Liban të ketë drejtësi.
