Tjetërsimi, mbivendosja apo vjedhja e pronave në Jug të vendit dhe sidomos atyre të Rivierës, janë një prej çështjeve më të mprehta, dosjet e të cilave kanë nisur të hetohen edhe nga SPAK-u.
E tillë është edhe dosja për një biznesmen që ka ngritur një resort turistik në Dhërmi, çështja e të cilit nga Prokuroria e Tiranës i kaloi SPAK-ut pak ditë më parë.
Kjo dosja mbante materialet që po hetoeshin mbi një tjetërsim të një sipërfaqeje toke në Dhërmi, mbi të cilën është ndërtuar kompleksi turistik “Ambel Beach”. Por tani kjo dosje ka përfunduar në Prokurorinë e Posaçme SPAK.
Çështja ishte dërguar në Prokurorinë e Tiranës, por hetuesit shpallën moskompetencë, dhe dosja kaloi në SPAK pak ditë më parë.
Hetuesit e SPAK do të hetojnë zyrtarë të agjencisë së ALUIZNI-t në Vlorë dhe biznesmenin Helidon Gjikoka, i cili tashmë i shpallur në kërkim pasi është larguar për në Britaninë e Madhe.
Në një komunikim telefonik me biznesmenin Gjikola, ky i fundit tha për “Shqiptarja.com” se, është i pafajshëm dhe nuk ka asnjë lidhje me çështjen, pasi objektin turistik, ai thotë se, e ka ndërtuar në tokë shtetërore, ku dhe ka paguar taksat e nevojshme në shtet.
Por pse e kërkon prokuroria arrestimin e Helidon Gjikokës?
Biznesmeni është në kërkim, pasi gjatë hetimit ka rezultuar se është i përfshirë në falsifikimin e dokumenteve duke tjetërsuar në mënyrë të paligjshme një pronë që i ka marrë një shtetasi tjetër, Ilir Kokës.
Prona në fjalë ndodhet në një zonë të lakmuar në Dhërmi, dhe siç sqarojnë burimet, Policia dhe Prokuroria kanë në “sitë” për të arrestuar edhe disa zyrtarë të ALUIZNI-t dhe Agjencisë Shtetërore të Kadastrës.
Këta zyrtarë, në shkelje të ligjit kanë vijuar procedurat për të hipotekuar tokën e tjetërsuar të biznesmenit Gjikoka. Pronari i ligjshëm i truallit është Ilir Koka, të cilit biznesmeni i mori tokën.
Disa vite më parë, biznesmeni ia mori pronën me qira Kokës, por qëllimi sipas prokurorisë ka qenë tjetërsimi. Dhe ia doli.
Toka e Ilir Kokës u bë e Helidon Gjikokës, falë edhe zyrtarëve të shtetit, ku biznesmeni ndërtoi një hotel buzë detit. Fati i buzëqeshi tashmë për herë të dytë, dhe pas njoftimit me fletëthirrje nga gjyqtari Gramoz Levanaj, biznesmeni arriti të largohej shumë larg Shqipërisë.
/Burimi: Shqiptarja.com/Përshtati: GazetaReforma.com/
