Një ngjarje e rëndë është parandaluar nga policia e kryeqytetit, e cila ka arrestuar një 43-vjeçar.
Shërbimet e Komisariatit të Policisë Nr. 4, pas njoftimit të marrë se në një lokal në rrugën “Spiro Çipi”, një person kishte hyrë me armë zjarri dhe po kërcënonte për motive të dobëta një shtetase, kanë shkuar në vendngjarje dhe kanë prangosur shtetasin A. U., 43 vjeç, lindur dhe banues në Tiranë.
Shtetasi i sipërpërmendur rezulton i dënuar më parë për veprat penale “Mashtrimi” dhe “Vjedhja e energjisë elektrike ose impulseve telefonike”.
Arrestimi i tij u bë pasi për motive të dobëta, kërcënoi për vrasje shtetasen P. R., qiradhënëse e lokalit ku u kap 43-vjeçari.
Grupi hetimor ka sekuestruar në cilësinë e provës materiale armën e zjarrit pistoletë, e cila është dërguar në laboratorin kriminalistik, për ekzaminime të mëtejshme.
Materialet i kalojnë Prokurorisë së Rrethit Gjyqësor Tiranë, për veprime të mëtejshme, për veprat penale “Kanosja” dhe “Armëmbajtja pa leje”, për të cilën parashikohet dënimi deri në 7 vjet burgim.
