Barazimi pa gola mes Shqipërisë dhe Serbisë në “Arenën Kombëtare”, në kuadër të kualifikueseve për Kupën e Botës 2026, u shoqërua me një episod të pazakontë që ka tërhequr vëmendjen e mediave në rajon.
Gjatë një transmetimi të drejtpërdrejtë përpara stadiumit, gazetari i Al Jazeera Balkans, Milan Boskovic, u përball me një moment të papritur: një tifoz shqiptar iu afrua dhe e puthi në faqe.
Gjestit të papritur, gazetari serb iu përgjigj me sportivitet, duke buzëqeshur dhe duke bërë shenjë drejt studios, ndërsa ruajti qetësinë dhe vazhdoi raportimin.
Pamjet e këtij momenti, në një sfond ku zakonisht dominojnë tensionet, u interpretuan si një mesazh i heshtur paqeje dhe mikpritjeje: “Ne nuk jemi si ata që na përfytyrojnë”.
Episodi u bë viral në mediat ballkanike, duke spikatur si një nga momentet më të komentuar të mbrëmjes.
