Prokuroria Themelore Publike e Kumanovës ka hapur hetime lidhur me thirrjet raciste dhe gjuhën e urrejtjes që u dëgjuan më 2 gusht në sallën sportive të Kumanovës, gjatë ndeshjes kualifikuese të basketbollit mes përfaqësueseve të Maqedonisë së Veriut dhe Rumanisë.
Autoritetet kanë urdhëruar mbledhjen e materialeve video nga kamerat e sigurisë për të identifikuar autorët e këtyre veprimeve, të cilat sipas Kodit Penal të vendit janë të dënueshme me burg.
“Prokuroria ka lëshuar urdhra dhe udhëzime për bashkëpunim me Stacionin Policor të Kumanovës, në mënyrë që të mblidhen dhe shqyrtohen elementet e veprës penale në lidhje me thirrjet që përmbajnë gjuhë urrejtjeje nga persona të panjohur gjatë ndeshjes,” deklarojnë nga Prokuroria Themelore Publike e Kumanovës.
Në përputhje me Kodin Penal të Maqedonisë së Veriut, thirrjet që nxisin intolerancë kombëtare, racore ose fetare dënohen me burg nga një deri në pesë vjet. Ligji parashikon dënim për këdo që përmes ngacmimit, ekspozimit të simboleve në mënyrë tallëse apo dëmtimit të pronave shkakton ose nxit urrejtje dhe përçarje në shoqëri.
Sipas informacioneve të para, thirrjet raciste dyshohet se kanë ardhur nga tifo grupi “Kumani” nga Kumanova, i cili është i njohur për incidente të ngjashme në të kaluarën.
Ironikisht, këto thirrje u dëgjuan në prani të figurave të larta shtetërore si kryeministri Hristijan Mickoski, zëvendëskryeministri për Marrëdhënie Ndërmjet Komuniteteve Ivan Stoilkoviq, ministri i Punëve të Brendshme Pançe Toshkovski dhe kryetari i Kumanovës, Maksim Dimitrievski.
Pavarësisht rregullave të sportit që kërkojnë ndërhyrje të menjëhershme ndaj tifozëve në rast thirrjesh të tilla, stafi i referëve ndërkombëtarë, Georgios Poursanidis (Greqi), Yeren Yilmaz (Turqi) dhe Ventsislav Velikov (Bullgari), nuk duket se ka marrë informacion të plotë mbi incidentin.
Gjithçka është transmetuar drejtpërdrejt në kanalin zyrtar të Federatës Ndërkombëtare të Basketbollit në YouTube.
Organizata Komiteti i Helsinkit për të Drejtat e Njeriut thekson se gjuha e urrejtjes është një problem i pranishëm prej vitesh në Maqedoninë e Veriut, kryesisht e lidhur me përkatësinë etnike.
Harta e vendit është e mbushur me raste të raportuara të këtij lloji, duke evidentuar një shqetësim të vazhdueshëm mbi përçarjet etnike dhe shoqërore.
