Policia e Tiranës ka arrestuar një 41-vjeçar, i cili kishte shkelur masën e sigurisë “arrest në shtëpi”.
Shtetasi E. S. u kap në flagrancë nga shërbimet e Policisë, teksa ishte larguar nga banesa, në kundërshtim me vendimin e Gjykatës, e cila e kishte dënuar me këtë masë për veprën penale “Prodhimi dhe shitja e narkotikëve”.
Gjatë kontrollit fizik ndaj tij, si dhe gjatë bastisjes në banesën e 41-vjeçarit, Policia gjeti dhe sekuestroi në cilësinë e provës materiale:
• 103 gramë kokainë, e ndarë në doza gati për shitje;
• 23 000 lekë dhe 940 euro, të dyshuara si të ardhura nga aktiviteti kriminal;
• 1 armë të ftohtë, një bllokues valësh, një radio policie, municion luftarak dhe sende të tjera të paligjshme.
Materialet iu referuan Prokurorisë për veprime të mëtejshme ligjore.
