Tashmë duket se koronavirusi e ka kaluar kulmin e tij edhe në Kosovë, pasi prej ditësh ka patur një rënie të qëndrueshme, teksa ditën e sotme është regjistruar vetëm një rast i ri, duke e çuar në 861 numrin total të të prekurve.
Instituti Kombëtar i Shëndetësisë Publike të Kosovës, ka njoftuar se sot në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 194 mostra të marra nga Klinika Infektive dhe gjurmimi i kontakteve të rasteve në terren.
Po ashtu, janë shëruar 28 pacientë dhe tashmë numri i përgjithshëm i të shëruarve është 56.
Ditën e sotme gjithashtu është regjistruar edhe 1 viktimë, pasi një 63-vjeçare nga Plavë-Dragash ka ndërruar jetë, pasi kishte qëndruar në Klinikën Infektive për 2 javë në gjendje të rëndë, teksa mësohet se vuante edhe nga sëmundje shoqëruese, si: insuficiencë renale terminale, hemodializë të rregullt, hiabetes melitus.
Prej ditësh në Kosovë ka nisur faza e parë e lehtësimit të masave që përfshin periudhën nga 4 deri më 18 maj dhe gjatë kësaj kohe do të hapen bizneset, si: ndërtimtaria dhe patundshmëria, tregtia e automjeteve, pjesërisht tregtia me pakicë, pjesërisht riparimi i artikujve personalë dhe i orendive, si dhe zyrat e konsulencës.
Faza e dytë fillon nga 18 maji deri më 2 qershor dhe gjatë saj do të fillojë operimi i bizneseve, si: tregtia me pakicë, dentistët dhe fizioterapeutët, floktarët, tregu i gjelbër, gastronomia, transporti hekurudhor, transporti urban dhe ndër-urban dhe qendrat e thirrjeve.
Faza e tretë, ndërkaq, hyn në fuqi më 2 qershor e deri në vendimin e radhës dhe do të lejohen transporti urban dhe ndër-urban, taksitë, gastronomia, provimet në arsimin e lartë, testi i maturës dhe arritshmërisë, hapja e kinemave, e teatrove dhe hapja selektive e aktiviteteve sportive.
