Media britanike “The Mirror”, i ka kushtuar një artikull të dënuarve shqiptarë që janë transferuar së fundi nga Mbretëria e Bashkuar për të vuajtur dënimin në Shqipëri. Në artikull thuhet se burgjet në Shqipëri kanë kushte të rehatshme, madje dhe dhoma ku mund të qëndrojnë në intimitet me partneret e tyre.
“Kriminelët e transferuar në burgjet e vendit mund të gëzojnë katër orë në muaj në shtrat me gjysmat e tjera të tyre, ndryshe nga këtu ku nuk lejohen vizitat bashkëshortore”, thuhet mes të tjerave në artikullin e medias britanike.
Pjesë nga shkrimi:
Zbulimi ynë vjen pasi rreth 200 keqbërës – përfshirë vrasës dhe përdhunues – janë vendosur të transferohen në burgje të qeta në Shqipëri, sipas një marrëveshjeje me Qeverinë e Mbretërisë së Bashkuar. Sipas rregullores së tyre të burgut: “çdo burg duhet të ketë një ambient të veçantë për takimet e bashkëshortëve”.
“Një objekt i tillë duhet të ketë shtretër dhe çarçafë të cilët duhet të ndërrohen në fund të çdo takimi.” Rregullat shtojnë: “vizitat e zgjatura lejohen për të dënuarin që është i martuar ose bashkëjeton sipas Kodit të Familjes pasi gruaja të jetë kontrolluar nga policia”.
Përparësitë e tjera përfshijnë paketa javore me ushqime dhe rroba nga familja, ambiente personale gatimi dhe leje deri në shtatë ditë për sjellje të mirë. Personat e riatdhesuar përfshijnë edhe një mbret droge që u transferua.
Erald Mema, 39 vjeç, u dënua me 25 vjet nga një gjykatës në Gjykatën e Kurorës së Oksfordit në tetor 2018 për një sasi të madhe kokaine. Ai është në mesin e shumë shtetasve shqiptarë që u është dhënë mundësia për t’u transferuar në burgjet në atdhe.
Rreth 12 vrasës, tetë përdhunues dhe më shumë se 100 fajtorë për vepra penale që lidhen me trafik droge ose armë zjarri pritet të kthehen për të vuajtur pjesën tjetër të dënimit.
Disa do të kryejnë më pak kohë se sa po të qëndronin në MB, pasi dënimet janë përshtatur me dënimin që do të kishin marrë nga sistemi i drejtësisë në Shqipëri. Në disa raste kjo është më e ulët, por në burgjet e Mbretërisë së Bashkuar të këqijnjtë lirohen në gjysmë të rrugës me licencë për të liruar vendet në qeli.
Duke shpallur marrëveshjen vitin e kaluar, Sekretari i Drejtësisë Alex Chalk tha: “Publiku pret që kriminelët e huaj duhet të vuajnë dënimet e tyre jashtë shtetit – jo në burgjet tona në kurriz të taksapaguesve. Kjo marrëveshje do të përshpejtojë largimin e shkelësve të ligjit dhe do t’u japë viktimave besimin se kriminelët e rëndë do të vazhdojnë të përballen me drejtësinë.”
Ministria e Drejtësisë tha: “Pasi deportohen, shtetasit e huaj shërbejnë në paraburgim – dhe sipas rregullave – të shtetit të tyre”.
