Ditën e sotme, pas disa përpjekjesh, është zhvilluar takimi mes kreut të Vetëvendosjes, Albin Kurti, dhe presidentit të Kosovës, Hashim Thaçi.
Pas përfundimit të takimit, Thaçi deklaroi se i ofron kohë shtesë edhe 48 orët e ardhshme për nominimin e kandidatit për kryeministër/re të ardhshëm të qeverisë së Republikës së Kosovës.
“Sapo zhvillova një takim të shkurtër me kryetarin e Lëvizjes Vetëvendosje, Albin Kurtin, në përpjekje për të implementuar rezultatin zgjedhor të Zgjedhjeve të Përgjithshme të 6 tetorit të vitit të kaluar. Tashmë është bërë hapi i parë i rëndësishëm i konstituimit të Kuvendit të Republikës së Kosovës, për çka përsëri i përgëzoj deputetët e Kuvendit të Kosovës. Nevoja e formimit të Qeverisë është jetike për shtetin dhe qytetarët e Kosovës. Zoti Kurti sot nuk ishte i gatshëm të ofrojë propozimin e të nominuarit nga Lëvizja Vetëvendosje. Si president i vendit do ta ushtroj autoritetin tim kushtetues dhe ligjor të ruajtjes dhe kultivimit të unitetit politik e qytetar dhe orientimit euroatlantik të shtetit të Kosovës. Prandaj, kam vendosur që t’i ofroj z. Kurti kohë shtesë edhe 48 orët e ardhshme për nominimin e kandidatit/kandidates për kryeministër të ardhshëm të Qeverisë së Republikës së Kosovës, para se të marr veprimet e radhës kushtetuese dhe ligjore.”- tha Thaçi.
Ndërsa, Albin Kurti gjatë fjalës së tij, të mbajtur në një deklaratë për shtyp, deklaroi se shpreson që të takohen sa më parë me LDK-në për t’i finalizuar takimet me një marrëveshje për koalicion.
“Unë besoj që qytetarët e Republikës tash i duan ministrat, e jo vetëm se cila parti çfarë mori e çfarë nuk mori. Besoj që do të takohemi dhe të fillojmë fazën e re të përmbylljes së këtyre takimeve dhe ta finalizojmë me një marrëveshje për koalicion”.
Po ashtu, kreu i Vetëvendosjes bëri publik edhe emrat e kandidatëve të tij, sa i takon krijimit të qeverisë së re të Kosovës.
“Nga VV, unë si kryeministër i qeverisë së re, kam përzgjedhur: për zëvendëskryeministër të dytë të qeverisë, Haki Abazi, për Ministre të Drejtësisë, Albulena Haxhiu, për Ministër të Punëve të Jashtme dhe Diasporë, Prof. Blerim Reka, për Ministër të Financave dhe Transfereve, Prof. Besnik Bislimi, për Ministër të Ekonomisë, Tregtisë dhe Industrisë, Rozeta Hajdari, dhe, për Ministër të Shëndetësisë dhe Sportit, Arben Vitia”, deklaroi Kurti.
Thaçi e ka ftuar dy herë Albin Kurti për të caktuar mandatarin për formimin e Qeverisë.
Mirëpo, Kurti ka refuzuar, duke arsyetuar se nuk ndodhej në Prishtinë.
Ndonëse pak ditë më parë u themelua legjislatura e 7-të e Kuvendit të Kosovës, qeveria e re nuk është formuar ende.
Megjithatë, duket se më në fund mund të ketë një marrëveshje për formimin e koalicionit mes VV dhe LDK.
