Shkencëtarët po ja dalin në një kohë rekord jo vetëm në sektorin e vaksinave, por edhe në testime dhe medikamente në luftën kundër koronavirusit.
Një lajm i mirë në sektorin e ekzaminimeve vjen nga Londra, aty ku disa shkencëtarë kanë bërë një zbulim sa të madh aq edhe drithërues.
Bëhet fjalë për zhvillimin e një testi të ri gjaku, që sipas studiuesve mund të parashikojë me saktësi të lartë nëse një pacient me Covid-19, do të ketë nevojë për kujdes intensiv, apo ka gjasa të mbijetojë pasi është prekur nga sëmundja vdekjeprurëse, raporton “Daily Mail”.
Sipas “Mail”, nëse testi do të jap efekt mund t’u mundësojë mjekëve që të orientohen drejt trajtimit të pacientëve që kanë nevojë, duke bërë kështu që të rritet edhe mundësia për mbijetesë.
Ky test mund të rrisë edhe vendosmërinë e mjekut, kur bëhet fjalë për vendime të rëndësishme për pacientët.
Më herët këtë vit, biokimisti Markus Ralser me bazë në Londër dhe kolegët e tij, identifikuan plot 27 proteina në gjakun e pacientëve me COVID-19, që ishin të pranishme në nivele të ndryshme në varësi të ashpërsisë së simptomave.
Që atëherë, ata kanë ndjekur 160 pacientë me COVID-19, gjaku i të cilëve u testua kur u shtruan në spital, për të eksploruar nëse mund të parashikonin përmes proteinave përparimin e sëmundjes.
“Daily Mail” shkruan po ashtu se, ideja është që mjekut t’i sigurohet një “pamje digjitale” mbi sa i sëmurë është një pacient.
Shkencëtarët thonë se, në rastin e COVID-19, vihet re një fenomen i quajtur “hipoksi e lumtur”, që do të thotë që një pacient mund të ndihet relativisht mirë, por pastaj përkeqësohet shpejt.
Testi është përdorur deri më tani nga 24 pacientë të sëmurë, ku parashikoi saktë rezultatin për 18 nga 19 njerëz që mbijetuan dhe 5 pacientët që ndërruan jetë.
/Burimi: Daily Mail/Përshtati: GazetaReforma.com/
