Shefja e Institutit të Shëndetit Publik (ISHP), Albana Fico, ka deklaruar se Komiteti Teknik i Ekspertëve, ka dhënë dakordësinë për përdorimin e testeve të shpejta anti-genik, të cilët sipas saj gjurmojnë një proteinë që është e lidhur me Covid-19.
“Komiteti i Ekspertëve ka dhënë okay-n. ISHP ka qenë e përgatitur, kemi bërë udhëzuesin gati. Ne jemi të qartë për grupet specifike dhe koha është tani. Testet e shpejta janë të tipit antigenik dhe zbulojnë një proteinë të caktuar që është lidhur me covid-19.
Kur ka rritje të transmetueshmërisë, këto teste kanë një vlerë të caktuar dhe përdoren në ato pika ku ne kemi problematikë, si fasoneria, shkolla… Duhet të kuptojmë që pavarësisht përdorimit të këtyre testeve që u vihen në dispozicion mjekëve të familjes, spitaleve rajonale dhe epidemiologëve, ne do ti monitorojmë”, ka thënë Fico.
Drejtoresha e ISHP-së, ka shpjeguar më tej edhe përse vonohet procesi i bërjes së tamponeve.
“Ka disa momente në të cilat ka pasur shtim të numrit të infeksioneve. Në këto momente me rritjen e numrit të infektuarve ka dhe një rritje të numrit të testimeve. Kjo përkthehet dhe në një vonesë të vogël të ritestimve. Ka dy gjëra, sot jemi në katërfishim nga qershori dhe ky është një numër i madh testimesh. Në këtë proces ka dhe vonesa përsa u përket ritestimeve. Testimet i kryen ISHP me dy laboratorët e vetë, është ISUV-i, është dhe QSUT”, ka thënë Fico.
Në lidhje me rrezikshmërinë e përhapjes së virusit në vatra të reja nëpër shkolla, si dhe nëse këto të fundit kanë të njëjtën rrezikshmëri si baret dhe restorantet, Fico u shpreh se nga të dhënat ka dalë se rastet pozitive në shkolla nuk kanë ndikuar shumë në pozitivitetin e përgjithshëm të rasteve në Shqipëri.
“Përgjatë hapjes së shkollës e deri tani janë dy muaj dhe është e provuar që rastet pozitive nga shkollat nuk kanë pasur pozitivitet të veçantë në rastet në Shqipëri. Edhe mësuesit që kanë qenë pozitivë janë marrë masa dhe janë dezinfektuar shkollat.
Mësuesit, nxënësit, personeli mjekësor, shtëpitë e të moshuarve, janë disa grupe që monitorohen në mënyrë tejet skupuloze pasi në këto grupe kemi interes që të mos kthehen në fenomene për transmetueshmërinë e virusit”, ka shtuar Fico, shefja e ISHP-së./GazetaReforma.com/
