Kryeministri Edi Rama, në cilësinë e kryetarit të OSBE, është takuar me sekretarin e përgjithshëm të NATO-s, Jens Stoltenberg.
Ky i fundit gjatë fjalës së tij, u ndal edhe te tragjedia e 26 nëntorit, ku tërmeti i fuqishëm u mori jetën 51 personave.
Stoltenberg shprehu ngushëllime për jetët e humbura.
Gjithashtu ai ndau personalisht ngushëllimet me kreun e qeverisë, për humbjen e të fejuarës së djalit të tij.
“Kryeministër Edi Rama është kënaqësi t’iu shohim sërish. Ne jemi të gjithë të shokuar nga tërmeti që goditi Shqipërinë nëntorin e kaluar. Të gjithë ndjemë dhimbjen e atyre që vuajtën. Edi, ju përjetuat gjithashtu një humbje personale, Ju lutem pranoni ngushëllimet e mia të sinqerta, për të gjitha ata që humbën të dashurit nga tërmeti. Ne qëndrojmë dhe veprojmë bashkë kur njëri vuan”, tha Jens Stoltenberg.
Ndër të tjera, shefi i NATO-s u ndal edhe te konflikti mes Ukrainës dhe Rusisë.
Ai mbështeti punën e kryeministrit Rama, për forcimin e pozitës dhe aktivitetit të OSBE në Ukrainë.
Më tej Stoltenberg tha, se janë të papranueshme sulmet ndaj dronëve survejues.
Çështje të tjera që u diskutuan nga dy liderët ishin edhe linja ajrore Beograd-Prishtinë, si dhe projekti për ndërtimin e bazës së NATO-s në Kuçovë.
