Tërmeti i fuqishëm i 26 nëntorit ka dëmtuar edhe shkollën “Emin Duraku” në zonën e ish-Bllokut në Tiranë.
Shkolla ka dy godina, atë për filloren dhe tjetrën për 9-vjeçaren. Godinat janë shkëputur nga tërmeti dhe ajo e fillores ka probleme serioze, shkruan “Balkanweb”.
Në procesverbalin e Institutit të Ndërtimit, thuhet se është dëmtuar trau i katit të tretë të shtesës, ka plasaritje të thella të suvasë në katin e tretë shtesë dhe dëmtim të parapetit.
Më tej në procesverbal kërkohet që të pezullohet aktiviteti, deri në momentin që do të bëhen përforcimet e nevojshme.
Godina e fillores është shtuar në vitin 2006, si pasojë e rritjes së kapacitetit të nxënësve.
“Shkolla Emin Duraku, ka sistem konstruktiv me mure mbajtëse, tra dhe kolonë. Shkolla ka plasaritje të thella në muret ndarëse, dëmtim i traut të katit të tretë shtesë. Plasaritje të thella të suvasë në katin e tretë shtesë, dëmtim i parapetit në të gjithë godinën, shkëputje të shtesës nga objekti ekzistues. Bordi dhe shkolla kërkojnë shkallë emergjence. Shkolla ka dëmtime në strukturë, të pezullohet aktiviteti deri kur të bëhen përforcimet e nevojshme”, thuhet në procesverbalin e Institutit të Ndërtimit.
