Prokuroria e Posaçme Kundër Korrupsionit dhe Krimit të Organizuar (SPAK) ka kërkuar dënim për Leonard Luzin dhe Muharrem Koroveshin, të akuzuar si organizatorë të tentativës për vrasjen e Ervis Matodashajt dhe Inez Hajrullës në Vlorë.
Për secilin prej tyre është kërkuar dënimi me 11 vite burg. Megjithatë, duke qenë se gjykimi u zhvillua me procedurë të shkurtuar, dënimi përfundimtar pritet të reduktohet në 7 vite e 4 muaj.
Ndërkohë, për Amarildo Nikollin (alias Xhenje), i cili ka bashkëpunuar me prokurorinë si dëshmitar drejtësie, SPAK ka kërkuar 2 vite e 9 muaj burg, duke përfituar ulje dënimi për shkak të bashkëpunimit.
Organizimi i grupit dhe plani i vrasjes
Hetimet e SPAK kanë zbuluar se Leonard Luzi kishte krijuar një grup të strukturuar kriminal, me qëllim eliminimin e Hajrullës dhe Matodashajt, për shkak të konflikteve të dyshuara mbi kontrollin e lojërave të fatit.
Amarildo Nikolli ishte caktuar si ekzekutori, ndërsa Muharrem Koroveshi dhe Erio Zejno, i fundit ende në kërkim, ndihmonin me sigurimin e armëve dhe logjistikën për atentatin.
Më 7 gusht 2023, në lagjen “Uji i Ftohtë” në Vlorë, Amarildo Nikolli u arrestua nga policia para se të kryente atentatin. Gjatë kontrollit fizik ndaj tij, u gjetën një pistoletë me silenciator dhe 15 fishekë, ndërsa hetimet treguan se ai ishte në përgatitje për të finalizuar vrasjet.
Roli i të pandehurve dhe motivet e krimit
Sipas SPAK, Leonard Luzi dyshohet se ka marrë financime nga një person ende i paidentifikuar për të organizuar vrasjet. Koroveshi dhe Zejno siguruan armët dhe asistuan në gjetjen e viktimave dhe planifikimin e arratisjes pas atentatit.
Në këtë rast, veprimi i shpejtë i policisë dhe bashkëpunimi i Amarildo Nikollit me drejtësinë shmangën finalizimin e një krimi të rëndë. Përplasjet për lojërat e fatit dhe konfliktet mes grupeve kriminale në Vlorë mbeten motivi kryesor i këtij atentati të dështuar.
