Policia Kufitare e Portit të Durrësit ka goditur një rast të kontrabandës, duke sekuestruar një autobus dhe një sasi të konsiderueshme mallrash të dyshuara si të kontrabanduara.
Në kuadër të operacionit të koduar “Duo”, autobusi i drejtuar nga shtetasit Edmond Nikolli dhe Shkëlqim Çuni u ndalua për kontroll të detajuar në hyrje të Shqipërisë.
Gjatë verifikimeve, në mjet u gjetën veshje, pajisje, produkte ushqimore, kozmetike dhe pije alkoolike, të gjitha të papajisura me fatura blerjeje.
Si rezultat, 46-vjeçari Edmond Nikolli, banues në Lezhë, dhe 51-vjeçari Shkëlqim Çuni, banues në Shkodër, u arrestuan në flagrancë, për veprat penale “Kontrabanda me mallra për të cilat paguhet akcizë” dhe “Kontrabanda me mallra të tjera”, të kryera në bashkëpunim.
Gjithashtu, policia sekuestroi mallrat, autobusin, si dhe celularët dhe pasaportat e të arrestuarve. Materialet procedurale i kaluan Prokurorisë së Durrësit për veprime të mëtejshme.
