Një vrasje është parandaluar nga Policia e Lushnjes. 49-vjeçari, i identifikuar me inicialet G. H., ka tentuar të vrasë një 40-vjeçar. Ngjarja ka ndodhur në ambientet e një marketi në qytet. Si pasojë e sulmit me thikë, 40-vjeçari ka marrë dëmtime në kokë dhe trup, e aktualisht ndodhet në spital, jashtë rrezikut për jetën. Ndërsa agresori është arrestuar nga Policia.
Lushnjë/Ndërhyrja e Policisë parandalon një ngjarje që mund të kishte pasoja fatale. Tentoi të vriste me mjet prerës (thikë), një shtetas, vihet në pranga autori. Sekuestrohet mjeti prerës (thikë). Shërbimet e Komisariatit të Policisë Lushnjë, pas njoftimit të marrë se në një biznes (market), në qytetin e Lushnjës, ka një konflikt, menjëherë kanë ndërhyrë për të parandaluar ngjarjen e mundshme kriminale. Për këtë rast u arrestua në flagrancë shtetasi: -G. H., 49 vjeç, banues në Lushnjë. Ky shtetas dyshohet se ka tentuar të vrasë me mjet prerës (thikë), duke i shkaktuar dëmtime në kokë dhe trup, gjatë një konflikti për motive të dobëta, një shtetas 40 vjeç i cili aktualisht ndodhet jashtë rrezikut për jetën. Mjeti prerës (thikë) u sekuestrua në cilësinë e provës materiale. Materialet procedurale i kaluan Prokurorisë, për veprime të mëtejshme.
