Prej javësh situata në veri të Kosovës vijon të jetë problematike, madje duket se ditë pas dite po përkeqësohet.
Ndërkohë që edhe pse kreu i qeverisë shqiptare ka marrëdhënie shumë të mira me Vuçiç dhe po ashtu është një mbështetës i “zjarrtë” i Ballkanit të Hapur, ministrja e Jashtme Olta Xhaçka ka kritikuar ashpër Serbinë për tensionet në rritje në veri të Kosovës.
Me anë të një postimi në Twitter, Xhaçka i ka bërë thirrje autoriteteve serbe “të mos i justifikojnë as barrikadat e as grupet kriminale që refuzojnë t’i largojnë ato”.
Gjithashtu ministrja i konsideron veprimet e Serbisë si një lojë me zjarrin, që mund të ndikojë shumë negativisht në të ardhmen e brezit të ri.
“Po ndjekim me keqardhje minutë pas minute shfaqjen e një krize të tejzgjatur në mënyrë artificiale në veri të Kosovës dhe jemi thellësisht të shqetësuar nga përshkallëzimi i tensioneve. Barrikadat që janë ngritur në veri, jo prej ndonjë vale zemërimi popullor, por nga një grup kriminelësh famëkeq, nuk po pengojnë thjesht vijimin normal të jetës. Ato janë po ashtu skena që të kujtojnë ditët e errëta të viteve 1990, të cilat rajoni ynë i ka lënë pas njëherë e mirë, bashkë me ish-Jugosllavinë që shkoi e vate. Për pak vjen viti 2023! Kjo nuk është koha për të bërë kërcënime ushtarake apo për sulme të papranueshme kundër Policisë së Kosovës, KFOR dhe Policisë së EULEX. Kjo është koha për dialog dhe bashkëpunim. Kjo përballje e rrezikshme duhet të marrë fund dhe autorët duhet të nxirren përpara drejtësisë. Ne jemi me Kosovën në këtë situatë të vështirë dhe i bëjmë thirrje autoriteteve serbe të mos i justifikojnë as barrikadat e as grupet kriminale që refuzojnë t’i largojnë ato. Të luash me zjarrin është një ide shumë e keqe për të ardhmen e të gjithë fëmijëve tanë”, u shpreh ministrja Xhaçka.
