Banorët e Laknasit, në Bashkinë Kamëz janë përplasur në orët e para të mëngjesit me policinë dhe punonjësit e firmës që kërkon të ndërtojë thertoren e derrave në këtë zonë. Banorët thonë se fadroma është futur në fshat rreth orës 03:00 të mëngjesit dhe kanë prerë disa pemë.
Mësohet se protestës së banorëve të Laknasit i janë bashkuar edhe ambientalistët për ruajtjen e pyjeve. Një ndër ta ka qenë edhe Sazan Guri i cili thotë se është kërcënuar me jetë. Ambientalisti thotë se ata që i kanë drejtuar armën kanë qenë nipat e administratorit të firmës. Më tej Guri ka thënë se nuk i trembet kërcënimeve, por se është i shqetësuar vetëm për sigurinë e familjes së tij. Mësohet se pas ngjarjes Guri është drejtuar drejt komisariatit të policisë në Kamëz për të bërë kallëzim penal.
“Disa djem ishin duke udhëtuar me makinë dhe më drejtuan pistoletën. Jam kërcënuar 3 herë. Unë jam i prekur se mund të ketë pasiguri familja, por unë nuk kam frikë. Me mua nuk matet dot njeri, mua nuk më kërcënojnë dot. Nuk i kam frikë, pro ata duhet t’i vënë gishtin kokës që nuk kanë punë me mua. Le të fitojë me logjikë ai, jo me armë. Janë nipërit e Bledar Dacit, administratori i kësaj kompanie.”, ka thënë ambientalisti Sazan Guri.
Sjellim në vëmendje se mes banorëve të Laknasit dhe punëtorëve të firmës të cilat duan të shkatërrojnë pyllin që banorët e kanë mbjellë vetë ka pasur herë pas here përplasje. Ndërsa në një prononcim për mediat ditën e sotme një prej banorëve ka paralajmëruar se nuk do të tërhiqen dhe në qoftë se fadroma vazhdon me shkatërrimin e pyllit do të ketë gjakderdhje.
