Presidenti amerikan Donald Trump ka mbledhur kabinetin e tij për të diskutuar përpjekjet e Elon Musk për të reduktuar shpenzimet e qeverisë dhe numrin e personelit.
Sipas mediave, takimi është zhvilluar mes tensioneve, ku Musk ka akuzuar Sekretarin e Shtetit, Marco Rubio, për mungesë efikasiteti në shkurtimin e stafit të Departamentit të Shtetit.
Po ashtu, ai është përplasur me Sekretarin e Transportit, Sean Duffy, lidhur me reduktimet në sektorin e trafikut ajror.
Fillimisht, Trump qëndroi në heshtje, por më pas ndërhyri duke mbështetur iniciativën e Musk, të njohur si Doge.
Megjithatë, ai theksoi se nga tani e tutje, sekretarët e kabinetit do të kenë autoritetin kryesor, ndërsa ekipi i Musk do të shërbejë vetëm si këshillues.
Një zëdhënëse e Departamentit të Shtetit e cilësoi takimin si një “diskutim të hapur dhe produktiv”, ndërsa Shtëpia e Bardhë nuk ka dhënë komente shtesë.
Takimi duket se reflekton një përpjekje për të balancuar ndikimin e Musk në administratën Trump. Në javët e fundit, ai ka ndërmarrë hapa drastikë, duke u dërguar miliona punonjësve federalë e-maile që i inkurajonin të pranonin pagesa paraprake në këmbim të dorëheqjes.
Po ashtu, Doge ka shkarkuar punonjës të rinj të qeverisë pa mbrojtje të plotë të shërbimit civil, një veprim që disa agjenci kanë anuluar pasi prekte sektorë kritikë, përfshirë mbikëqyrjen e armëve bërthamore.
Trump ka mohuar çdo përplasje në kabinet dhe ka lavdëruar si Musk, ashtu edhe Rubio, duke thënë se ata bashkëpunojnë mirë. Megjithatë, postimi i tij në Truth Social sugjeron se ai po i jep më shumë fuqi sekretarëve të kabinetit për të kufizuar ndikimin e Musk.
Kjo mund të jetë një përpjekje për ta distancuar administratën nga paditë që e akuzojnë Musk për një rol të tepruar në qeveri.
Megjithëse ka spekulime për një përçarje mes Trump dhe Musk, ata vazhdojnë të ruajnë marrëdhënien e tyre të ngushtë.
Të premten, Musk u pa duke hipur në Air Force One me Trump për një udhëtim në Mar-a-Lago, çka tregon se, pavarësisht mosmarrëveshjeve, bashkëpunimi i tyre mbetet i fortë. Për momentin, duket se presidenti preferon të përdorë një “bisturi” për të reduktuar shpenzimet e qeverisë në vend të “sharrës elektrike” që simbolizon qasjen agresive të Musk.
