Ministria e Mbrojtjes në Greqi ka vendosur që të rrisë periudhën e ushtrisë nga 9 në 12 muaj duke filluar nga muaji maj i këtij viti.
“Arsyeja e rritjes së periudhës së shërbimit ushtarak, sipas Ministrisë së Mbrojtjes, është plotësimi i nevojave urgjente për personel të njësive ushtarake.
Bazuar në modelin e ri, skenari më i mundshëm është që periudha 12-mujore do të fillojë të zbatohet majin e ardhshëm” shkruan e përditshmja greke“Ta Nea”. Mirëpo ende ekziston një mundësi që një pjesë ta bëjnë 9 muaj shërbimin ushtarak, aq sa është aktualisht.
“Megjithatë ekziston një parashikim që të mbetet në 9 muaj periudha për ata që vendosin të kryejnë shërbimin ushtarak në kufi, në Evros ose në ishujt e Egjeut Lindor. Qëllimi është të motivojmë rekrutët” shkruan ndër të tjera gazeta greke “Ta Nea”.
Në muajt e fundit Greqia ka fuqizuar kapacitetet ushtarake, që pas përshkallëzimit të konfliktit me Turqinë për kufirin detar. Si pasojë pala greke duket se është detyruar të përmirësojë mbrojtjen ushtarake.
Marrëveshja e fundit me Francën për blerjen e 18 avionëve luftarakë “Rafale” thuajse është drejt fundit, ku kanë mbetur vetëm nënshkrimet e ministrave të Mbrojtjes së dy vendeve. Nga ana tjetër pala po nxiton procedurat për të forcuar të gjitha degët e ushtrisë së saj.
Mediat greke raportojnë se një gjë e tillë bëhet për të parandaluar ndonjë kërcënim të mundshëm nga Turqia.
Prioriteti i Ministrit të Mbrojtjes Nikos Panagiotopulos, i cili qëndroi në detyrë pas reformimit të fundit, është mirëmbajtja dhe përditësimi i pajisjeve ekzistuese ushtarake, si dhe prokurimi i pajisjeve të reja, moderne në kategoritë ushtarake ku kërkohet.
Një marrëveshje tjetër e rëndësishme për Greqinë është blerja e 36 silurëve të rinj gjermanë të rëndë për nëndetëset më të fundit të tipit 214. Marrëveshja parashikon gjithashtu modernizimin e një pjese të silurëve të SUT të viteve 1980.
Ushtria pra këmbësoria, është gjithashtu në planet e ministrisë për një “rifreskim”, pasi ajo vlerësohet si “shtylla kurrizore” e Forcave të Armatosura helene./Gazetareforma.com/
