Kreu i Komisionit të Prokurimit Publik (KPP), Jonaid Myzyri, është paraqitur në Gjykatën e Apelit të Posaçëm për të kundërshtuar masën e sigurisë “detyrim për t’u paraqitur” dhe pezullimin nga detyra.
Kjo masë u vendos nga Gjykata e Posaçme kundër Korrupsionit dhe Krimit të Organizuar, me kërkesë të SPAK, dhe përfshin dy masa sigurie: “Pezullimin e ushtrimit të një detyre a shërbimi publik”, sipas nenit 242 të Kodit të Procedurës Penale, si dhe “Detyrimin për t’u paraqitur në policinë gjyqësore”, bazuar në nenin 234 të të njëjtit Kod.
Procedimi penal lidhet me tenderin me numër reference REF-65268-07-13-2020, konkretisht “Loti V: Mirëmbajtje rutinë me performancë rruga Rrëshen (Ura e Fanit) – Shpal, Shpal – Q. Bene – Hadroj, Shpal – Ura e Repsit”, me një fond limit prej 219.866.693 lekësh pa TVSH. Procedura është zhvilluar më 18 shtator 2020 nga Autoriteti Rrugor Shqiptar (ARRSH).
Në lidhje me këtë rast janë marrë të pandehur: J.M., V.Zh., L.S., M.Z., E.B., V.H., G.A. dhe A.H., të dyshuar për veprën penale “Shkelje e barazisë së pjesëmarrësve në tenderë apo ankande publike”, kryer në bashkëpunim, në bazë të neneve 258 dhe 25 të Kodit Penal. Gjithashtu, shtetasit M.L., N.K. dhe A.K. dyshohen për veprën penale “Falsifikim i vulave, i stampave ose i formularëve”, parashikuar nga neni 190 i Kodit Penal.
