Kryetari i ri i Bashkisë Himarë do të jetë Vangjel Tavo i cili ka fituar me një diferencë me 1477 votash kundrejt kandidatit rival të koalicionit “Bashkë Fitojmë” në opozitë, Petro Gjikuria.
Pas shpalljes së rezultatit mëngjesin e sotëm, Tavo ka përsëritur “ofertën” e tij për Gjikurinë. Për të duket se është ende i hapur vendi si nënkryetar. Ndonëse në fund të mbylljes së procesit të votimit u shpreh besimplotë se do të fitonte, Gjikuria mes numërimit të kutive, duket se “u dorëzua”.
Por edhe përpjekjet e PD-së që Gjikuria të merrte postin e kryetarit të Himarës, këtë herë ishin më në hije. Fushata ka qenë gjithashtu zhgënjyese, ndërsa Gjikuria u justifikua se nuk pati mjaftueshëm kohë që të siguronte mbështetës. Në fakt, koha ishte e mjaftueshme, por Gjikuria e konsumoi duke nxjerrë probleme që dihen e që historikisht janë aplikuar nga të dyja palët, kartat e skaduara.
Një deklaratë jo bindëse nga e cila, dukej se Gjikuria e kishte pranuar “humbjen” përpara rezultatit. Sakaq ofertës së Tavos nuk ju përgjigj as me “jo” as me “po”.
“Të mos fillojmë me pyetje të tilla sikur keni ngrënë limona që në mëngjes”, ka deklaruar ai para gazetarëve.
Ajo që u vu re është se, ndryshe nga herët e tjera, këtë herë revolta e PD-së për humbjen e Gjikurisë nuk u ndje, përveç akuzave tek-tuk të Nokës “jo po leva, jo po X-i”, duke ngritur pikëpyetje nëse vërtet e kanë pranuar “humbjen” apo rezultati për fitoren e Tavos dihej.
Të gjitha çfarë përmendëm na çojnë pa dashur te marrëveshjet në heshtje “PD-PS”, nisur nga Amnistia Penale, Kodi i Ri Zgjedhor, plani për të çuar në greminë SPAK-un që Dumani mos hetojë asnjë aferë e krim që denoncojnë mediat e qytetarët.
PD dhe PS bashkuan forcat për një pseudoreformë dhe nuk përjashtojnë mundësinë që 106 votat “pazare” të ndryshojnë Kushtetutën. Ndërsa ish-ministri i Drejtësisë i kërkoi me tone të ashpra prokurorisë speciale të krijuar nga SHBA që të mos hetojë zyrtarët e lartë e familjarët e tyre, emrat e të cilëve kanë dalë në dosje me akuza të rënda për korrupsion.
Edhe heshtja e PD për fitoren e Tavos duket se është pjesë e kësaj marrëveshjeje që favorizon mazhorancën dhe opozitën e blerë./ Gazeta Reforma
