Prishja e Teatrit Kombëtar është padyshim një nga çështjet më të diskutuara dhe për këtë ka reaguar edhe Doris Pack.
Ish-eurodeputetja ka qenë e ftuar nga Aleanca për Mbrojtjen e Teatrit në takimin “Qytetarët dhe zëri i tyre në mbrojtje të trashëgimisë”.
Pack gjatë fjalës së saj ka thënë se pushtetet kryesore, si ai qendror edhe ai lokal duhet të rishqyrtojnë projektin edhe një herë.
“Këto kohë kur vjen në Tiranë shikon vetëm ndërtesa të larta, që nuk tregojnë asgjë nga shpirti i Shqipërisë. Unë mendoj se kryetari i Bashkisë dhe Këshilli Bashkiak duhet ta rikonsiderojnë çështjen e Teatrit. Le ta themi kështu mes nesh, shëtitorja që gjendet pas Teatrit është financuar nga BE, pra janë paratë tona”, theksoi Doris Pack.
Gjithashtu ish-eurodeputetja ka thënë se Rama si artisti duhet ta shikoj me më shumë seriozitet çështjen, ndërkohë që ka dhënë edhe një mesazh të rëndësishëm për ambasadorët e huaj.
“Mbështes protestën tuaj të vazhdueshme për këtë kauzë, për ta ruajtur këtë trashëgimi kulturore. Nuk e kam kuptuar pse kryeministri dëshiron t’ja heqë teatrin qytetarëve dhe nuk kanë marrë një vendim të konsultuar. Ambasadorët? Ata duhet të jepnin përgjigje se çfarë do të bënin për të njëjtën çështje në vendet e tyre”.
