Për ngjarjen e rëndë që tronditi Vlorën mesditën e sotme, Policia e Vlorës ka dalë me njoftim zyrtar në lidhje me të shtënat që u raportuan në zonën e Radhimës, pranë një beach bari. Policia raporton se ka pasur të shtëna me armë, po nuk del ende në konkluzionin nëse ka apo jo persona të lënduar.
Ndërkohë që në vendin e ngjarjes kanë shkuar disa makina policie dhe autoambulanca.
Burime bëjnë me dije se konflikti ka ndodhur mes 2 vëllezërve. Eduart Kondi ka shtënë me armë zjarri në drejtim të vëllait të tij të vogël Benjamin Kondi.
Të dy ata janë pronarë të Beach Barit në fjalë “Bora Bora”, dhe konflikti ka ndodhur për menaxhimin e plazhit.
Autori është arrestuar pak minuta më vonë nga Policia në një banesë në zonën e Lungomares.
Kujtojmë se ngjarja shkaktoi panik te të pranishmit.
Një prej turistëve të pranishëm, nga Norvegjia, është shprehur se kanë dëgjuar 3 apo 4 të shtëna, dhe ka parë njerëz që vetëm vraponin, pa mundur që të shihte nëse kishte qenë dikush i lënduar.
Turisti norvegjez: Ishim në plazh, dëgjuam të shtënat, u trembëm dhe ikëm nga cepi tjetër. Ndoshta 3-4 të shtëna. U trembëm.
Njoftimi i policisë:
Sot, rreth orës 12:30, në Radhimë, në afërsi të plazhit, në rrethana ende të paqarta, dyshohet se një shtetas ende i paidentifikuar, ka qëlluar me armë zjarri.
Po kryhen verifikime nga shërbimet e Policisë, nese ka persona të dëmtuar.
Janë ngritur pika kontrolli dhe vijon krehja e zonës për kapjen e autorit.
