Një festë ditëlindjeje me rreth 60 pjesëmarrës në qendër të Los Angeles u shndërrua në një skenë tragjedie, pasi gjatë natës u raportuan të shtëna me armë zjarri që lanë pas dy viktima dhe gjashtë të plagosur.
Sipas autoriteteve lokale, incidenti ndodhi pranë një depoje ku po zhvillohej festa dhe dyshohet të ketë lidhje me aktivitetin e bandave kriminale në zonë.
Dëshmitarët thanë se të shtënat u kryen nga një automjet tip sedan i kuq, por kjo nuk është konfirmuar zyrtarisht dhe deri tani nuk është bërë asnjë arrestim.
Policia e Los Angeles, e cila patrullonte pranë vendngjarjes, ndërhyri menjëherë dhe rrethoi zonën. Oficerët gjetën në rrugë disa persona të plagosur dhe me gjakderdhje, ndërsa paniku kishte përfshirë të pranishmit.
Një burrë 29-vjeçar, që sipas babait të tij punonte si DJ dhe ishte baba i tre fëmijëve të vegjël, humbi jetën në vend. Një grua 52-vjeçare, e plagosur rëndë, ndërroi jetë në spital. Dy burra të tjerë, të moshës 34 dhe 37 vjeç, ndodhen në gjendje kritike në spital, ndërsa katër persona të tjerë janë plagosur, por jashtë rrezikut për jetën.
Hetimet për këtë ngjarje të rëndë vazhdojnë, ndërsa autoritetet u bëjnë thirrje qytetarëve që kanë informacion të ndihmojnë në identifikimin e autorëve.
