Pasditen e sotme janë shënuar të shtëna me armë zjarri në Elbasan pranë fshatit Papër.
Mësohet se është qëlluar drejt një automjeti në levizje, dhe raportohet se deri më tani nuk ka asnjë person të lënduar. Burime bëjnë me dije se makina e shënjestruar është larguar nga vendi dhe se policia ka rrethuar zonën.
Në vendngjarje ka gëzhoja dhe xhama të thyer, ndërsa Policia e Elbasanit ka ngritur postoblloqe në hyrje të qytetit në Bradashesh.
Deri më tani dyshohet se ka persona të plagosur për shkak se goditjet kanë qenë të shumta por asnjë person nuk është paraqitur në spital.
Gjithashtu Policia e Shtetit ka dalë me një njoftim zyrtar lidhur me atentatin me armë zjarri që ndodhi në Papër, pasditen e sotme, rreth orës 17:35. Sipas njoftimit zyrtar, persona ende të paidentifikuar kanë qëlluar me armë zjarri në drejtim të një mjeti, targat e të cilit rezultojnë të vjedhura në Durrës në prill të vitit të shkuar. Gjatë krehjes së zonës është gjetur një mjet që dyshohet se është përdorur nga shënjestrat e atentatit, por ende nuk dihet se kush janë.
Njoftimi i Policisë:
Elbasan/ Informacion Paraprak
Rreth orës 17:35, në aksin rrugor Elbasan-Peqin, tek kryqëzimi i Urës së Zezë, janë dëgjuar të shtëna me armë zjarri.
Pak metra më poshtë vendit ku janë dëgjuar të shtënat është gjendur i braktisur mjeti tip B.M.W, ngjyrë e zezë, me xhama të thyer e goma të shpuara, si dhe targat janë deklaruar të vjedhuara në Durrës më datë 18.04.2021. Mjeti është i braktisur.
Deri më tani nuk kemi të dhëna për dëme në njerëz.
Shërbimet e Policisë ndodhen në vendngjarje dhe po krehin zonën si dhe po punohet për dokumentimin e plotë të ngjarjes.
