Një incident i rëndë sigurie është shënuar të enjten pranë selisë qendrore të CIA-s në Langley, ku një person u plagos nga të shtënat e rojeve të sigurisë.
Ngjarja ndodhi në afërsi të portës kryesore të kompleksit dhe është duke u hetuar nga autoritetet federale.
Zëdhënësi i CIA-s konfirmoi se ngjarja ka ndodhur jashtë perimetrit të sigurisë dhe nuk ka pasur rrezik për personelin apo ambientet e brendshme të institucionit.
“Pati një incident sigurie ndaj të cilit forcat e rendit reaguan jashtë selisë së CIA-s,” thuhet në deklaratë, ku sqarohet gjithashtu se hyrja kryesore mbetet e mbyllur dhe punonjësve u është kërkuar të përdorin rrugë të tjera.
Ende nuk janë bërë publike identiteti i personit të plagosur dhe motivet që mund të kenë çuar në këtë ngjarje.
Incidenti ndodh vetëm pak orë pas vrasjes së dy diplomatëve izraelitë, Yaron Lisinsky dhe Sarah Milgrim, të qëlluar për vdekje pranë Muzeut Hebraik në Uashington D.C. Deri tani, nuk ka prova që lidhin dy rastet me njëra-tjetrën.
