Një konflikt i çastit është bërë shkak që të shkrepej arma mbrëmjen e sotme në kryeqytet.
Katër persona janë shpallur në kërkim nga Policia e Tiranës, pasi kanë qenë pjesë e një konflikti në një lokal në rrugën “Naim Frashëri”, në afërsi të zonës së “21 dhjetorit”. Pas konfliktit të çastit, një prej tyre ka qëlluar me armë në ajër dhe më pas është larguar. Nga verifikimet e policisë, fatmirësisht nuk ka persona të lënduar. Ndërkohë, grupi hetimor po punon për sqarimin e rrethanave të ngjarjes dhe identifikim e personave që janë përfshirë në konflikt, gjithahstu edhe për kapjen e personit që qëlloi me armë në ajër duke u larguar më pas nga lokali.
NJOFTIMI I PLOTË I POLICISË:
Tiranë/Informacion paraprak
Më datë 29.03.2021, në rrugën “Naim Frashëri”, në afërsi të një lokali aty pranë, si pasojë e një konflikti të çastit midis 4 shtetasve ende të paidentifikuar, njëri prej tyre ka qëlluar me armë zjarri në ajër dhe është larguar.
Nga verifikimet e Policisë nuk ka persona të lënduar. Në vendngjarje ndodhet grupi hetimor i cili po vijon veprimet për sqarimin e rrethanave të kësaj ngjarje, identifikimin e personave të përfshirë në konflikt dhe kapjen e personit që qëlloi me armë zjarri.
