Situata në Rripin e Gazës vijon të përshkallëzohet mes shpresës për një armëpushim dhe realitetit të dhunshëm të terrenit.
Gjatë natës së fundit, 82 palestinezë humbën jetën nga sulmet ajrore dhe të shtënat, përfshirë 38 që ndodheshin pranë zonave të shpërndarjes së ndihmave humanitare, sipas të dhënave nga spitalet dhe Ministria e Shëndetësisë në Gaza.
Ndër viktimat, pesë persona u vranë në afërsi të zonave të lidhura me Fondacionin Humanitar të Gazës, një organizatë e re e mbështetur nga SHBA dhe Izraeli. Ndërsa 33 të tjerë u goditën në pika të tjera shpërndarjeje ndihmash.
Një tjetër valë viktimash u regjistrua nga sulmet ajrore që goditën tendat e të zhvendosurve në Muwasi dhe një shkollë në Qytetin e Gazës, ku ishin strehuar civilë.
Autoritetet shëndetësore në Gaza raportojnë se numri total i të vrarëve ka kaluar 57,000, përfshirë mbi 223 persona të zhdukur të cilët konsiderohen të vdekur.
Megjithatë, ministria nuk ndan civilët nga luftëtarët në bilancin zyrtar, edhe pse thotë se më shumë se gjysma e viktimave janë gra dhe fëmijë.
Këto zhvillime ndodhin në një kohë kur përpjekjet ndërkombëtare për arritjen e një armëpushimi po intensifikohen. Presidenti Donald Trump deklaroi se Izraeli ka rënë dakord për një marrëveshje armëpushimi 60-ditore dhe i ka bërë thirrje Hamasit të pranojë kushtet përpara se situata të përkeqësohet më tej.
Nga ana tjetër, përgjigjja e Hamasit ka qenë e paqartë, duke theksuar kushtin për përfundimin përfundimtar të luftës.
Ndërkohë, një propozim i ri i ndërmjetësuar nga Shtetet e Bashkuara, i raportuar nga The New York Times, parashikon një proces pesëfazor për lirimin e 10 pengjeve të gjalla dhe dorëzimin e trupave të 18 pengjeve të vdekur. Kjo nismë ndryshon nga plani i mëparshëm i muajit maj, që kërkonte lirimin e të gjithë pengjeve brenda javës së parë të armëpushimit.
Në 48 orët e fundit, sipas autoriteteve në Gaza, mbi 300 palestinezë janë vrarë si pasojë e operacioneve ushtarake izraelite.
Ndërsa konflikti i nisur më 7 tetor 2023, pas sulmit të Hamasit që vrau mbi 1,200 izraelitë dhe mori rreth 250 pengje, hyn në muajin e 21-të, Gaza mbetet në një krizë të thellë humanitare. Infrastruktura është shkatërruar, mbi 90% e popullsisë është zhvendosur, dhe qindra mijëra civilë përballen me uri dhe mungesë ndihmash jetike.
