Mbrëmjen e sotme presidenti i Kosovës, Hashim Thaçi, ka dhënë një intervistë për emisionin ‘Pressing’, ku ka folur për takimin dy orësh që zhvilloi dy javë më parë me kryeministrin në detyrë të Kosovës, Albin Kurti.
Kurti në seancën për rrëzimin e qeverisë, tha se presidenti Thaçi i ka thënë atij që të shkojnë në Amerikë, të nënshkruajnë marrëveshje dhe në këtë mënyrë ta heqin qafe Serbinë.
E kjo gjë është konfirmuar edhe nga Thaçi, i cili ka thënë se i ka bërë Kurtit një kërkesë të tillë dhe i ka kërkuar që të bëhen bashkë të gjithë liderët e partive politike, ashtu siç kishte ndodhur në Rambuje.
Ndër të tjera ai ka thënë se nuk e kanë komoditetin t’i thonë jo ftesave që mund të vijnë nga SHBA.
“Ftesa që mund të vinte nga SHBA, unë mendoj se nuk e kemi komoditetin ti themi jo. Nga teoritë konspirative që që vijnë ta merr mendja se po nisemi në Kremlin dhe jo në SHBA”, ka thënë ndër të tjera Thaçi.
Më tej, Thaçi ka thënë se pas mandatit si president do të largohet nga politika dhe do t’i përkushtohet familjes, edhe pse më parë kishte paralajmëruar se do të kandidonte për një mandat të dytë.
“Unë mendoj se pas përmbylljes së mandatit, t’i kthehem vetvetes, t’i kthehem familjes. Do të japë kontributin tim gjithmonë për vendin, por si qytetar. Do të bëjë ndonjë punë tjetër jashtë politikës. Asnjë lider nuk duhet ta marrë largimin e një lideri nga skena politike si traumë, përkundrazi duhet ta merr si emancipim. Pas shpalljes së pavarësisë së Kosovës, unë nuk kam ndonjë aspiratë politike”, tha Thaçi.
Më 25 mars ‘qeveria Kurti’, e cila u formua 3 muaj pas zgjedhjeve të 6 tetorit, ra pas 51 ditësh në pushtet, duke u bërë qeveria më jetëshkurtër.
Qeveria më ‘jetëshkurtër’/ Votohet mocioni i mosbesimit, bie qeveria e Albin Kurtit
Pas një seance maratonë, Kuvendi votoi me 82 vota pro, 32 kundër dhe 2 abstenime për rrëzimin e qeverisë, pasi LDK inicioi ‘mocionin e mosbesimit’ duke u përkrahur nga të gjitha partitë opozitare dhe minoritetet, teksa të vetmit që votuan kundër ishte partia Vetëvendosja.
Shkak për “mocionin e mosbesimit” u bë shkarkimi i ministrit të Brendshëm Agim Veliu, pasi ai i doli kundër qeverisë dhe kërkoi shpalljen e gjendjes së jashtëzakonshme, duke përhapur panik.
Gjatë seancës maratonë, kreu i VV tha se Veliu kishte kohë që i dilte kundër qeverisë dhe provokonte me qëndrimet e tij, duke hedhur akuzat se çdo gjë ka qenë e mirëmenduar teksa vijoi me tej duke shtuar se LDK do të bëhet palë me Richard Grenell dhe presidentin Thaçi për të shkëmbyer territoret e Kosovës me Serbinë.
