Ambasadori i Bashkimit Europian në Shqipëri ka dërguar një mesazh të qartë për qeverinë dhe partitë politike, gjatë fjalës së tij në konferencën e përbashkët me kryeministrin Edi Rama, për progres-raportin e Shqipërisë nga Komisioni Europian.
Soreca ka përmendur fushat ku progresi ka qenë i pamjaftueshëm dhe theksoi se reformat duhet të vazhdojnë.
“Raporti bazohet tek metodologjia e re, është një vlerësim i drejtë i situatës në shqipëri në lidhje me rrugëtimin e saj drejt BE, janë dhënë merita dhe janë theksuar fushat ku progresi ka qënë i pamjaftueshëm dhe kërkohet më shumë vëmendje. Shqipëria i ka përmbushur kushtet dhe se konferenca e parë ndërqeveritare duhet të ndodhë sa më shpejt të jetë e mundur, para mbarimit të vitit. Shtyrjet apo vonesat do të kenë një ndikim negativ për besueshmërinë e BE”, tha Soreca.
Ambasadori u ndal veçanërisht tek problemet e medias në Shqipëri, duke thënë se fushata e baltosjes kundër gazetarëve nuk duhet të vazhdojë. Soreca vuri në dukje se duhet bërë më shumë për të fuqizuar pavarësinë dhe standardet e mediave, ndërsa shtoi se ligji për median duhet të jetë në përputhje me Komisionin e Venecias
“Sa i takon lirisë së shprehjes, atmosfera e sulmeve verbale dhe fushata e baltosjes kundër gazetarëve nuk duhet të vijojnë. Duhet bërë më shumë për fuqizimin e pavarësisë dhe standardeve të mediave. Ligji për median duhet të jetë në përputhje me Komisionin e Venecias”, tha Soreca.
Ambasadori Soreca vuri në dukje një problem që është prezent prej kohësh në Shqipëri, me jo pak raste kur politikanët intimidojnë gazetarët, sa herë nuk janë dakord me pyetjet apo nuk kanë një përgjigje. Kjo dhe mënyra të tjera të kontrollit e kanë cenuar punën e mediave dhe të gazetarëve. Kohët e fundit në qendër të vëmendjes ka qenë “Agjencia për Media dhe Informim”. Me anë të këtij mekanizmi, qeveria tenton të zbehë rolin e medias dhe ashtu siç shprehen edhe disa ekspertë, do të risjellë një “Ministri Propagande”. Agjencia supozohet të përbëhet nga disa struktura të posaçme përgjegjëse për informim pranë çdo ministrie dhe institucioni qendror në varësi të kryeminstrit dhe ministrave dhe do të koordinojë punën mes tyre për të informuar publikun dhe median.
