Baret dhe restorantet janë bizneset e para që janë mbyllur me vendim qeverie, për shkak të COVID-19, duke u konsideruar si vende ku rreziku i përhapjes së infeksionit është shumë i madh.
Duke qenë se aktiviteti i tyre ka qenë i pezulluar për dy muaj, dëmi ekonomik i shkaktuar është shumë i madh.
Kreu i sektorit të hoteleve, Zak Topuzi, u shpreh për emisionin “Real Story”, se qeveria duhet të mendojë për një paketë të tretë për baret dhe restorantet.
Sipas tij, këto biznese janë jashtëzakonisht të prekura, pasi kanë qira të larta, ndërsa shtoi se ky sektor duhet të përfitojë edhe uljen e TVSH-së.
Gjithashtu ai kërkoi lëvrimin e kredisë për baret dhe restorantet, në mënyrë që të përgatiten për hapjen e sezonit veror.
“Kjo është njësoj si lufta. Kemi shkuar në luftë, dhe është e pamundur që të rezistojë pa të vdekur, pa të falimentuar. Ndaj bota, rekomandon disa masa për ekonominë, që është motor i përgjithshëm. Ndaj duhet të implementohet urgjent një paketë. Jemi në momentet ku fillimi i qershorit të jetë fillimi i turizmit. Duhet të bësh kuzhina ndihmëse, të modifikosh baret. Ndaj është me rëndësi që kjo kredi të lëvrohet shpejt. Në këtë sektor është me rëndësi pjesa e bareve restoranteve. Ne jemi pjesë e Shoqatës Ballkanike të Hoteleve dhe Restoranteve e bareve, ku Shqipëria zë vendin e parë në 10 vite. Jemi në vendet e para të restoranteve dhe ia marrin dhe Greqisë. Jemi në vend të dytë për baret, pasi vendin e parë e zë Greqia. Ky është sektor i goditur. Paketa e tretë duhet të përfshijë dhe baret dhe restorantet. Janë goditur dhe do goditen nga kjo pandemi, nga distancimi. Kanë ambiente me qira jashtëzakonisht të shtrenjta. Duhet të përfitojë ky sektor për uljen e TVSH-ve.”, pohoi ai.
