Në Gjykatën e Posaçme vijon dëshmia me dyer të mbyllura e Nuredin Dumanit, i konsideruar një nga vrasësit me pagesë më të rrezikshëm, por tashmë bashkëpunëtor i drejtësisë.
Dumani po dëshmon kundër të arrestuarve në procesin gjyqësor të njohur si “Plumbi i Artë”, ndërsa seanca është shoqëruar me tone të ashpra dhe kundërshtime nga të pandehurit.
Njëri prej tyre, Gentjan Sharra, ka hedhur poshtë akuzat, duke pretenduar se në kohën kur Dumani e implikon, ai ka pasur biznese dhe ka marrë tendera me vlerë deri në 2 milionë euro.
“Kam pasur një makinë që kushtonte 50 mijë euro, pse do të kisha nevojë të merrja pjesë në një grabitje për disa mijëra euro?”, është shprehur Sharra në sallën e gjyqit.
Një tjetër i arrestuar, Petrit Qoli, ka deklaruar se prej tre vitesh mbahet në burg për shkak të dëshmisë së Dumanit, ndërsa jashtë ka lënë gruan që dashuron.
“Kjo është padrejtësi. Kam tre vite që vuaj për deklaratat e tij”, ka pohuar ai.
Ndërkohë, një tjetër i akuzuar, Enver Diva, i ka kërkuar gjykatës që, pas përfundimit të dëshmisë së Dumanit, të lejohen gazetarët në sallë për të dëgjuar dhe pasqyruar versionin e tyre të ngjarjes, duke pretenduar se deklarimet e Dumanit janë të njëanshme dhe të pabazuara.
Seanca pritet të vazhdojë edhe në ditët në vijim, ndërkohë që tensionet mes të arrestuarve dhe bashkëpunëtorit të drejtësisë mbeten të larta.
