Kalifornia nuk ka shpallur ende pavarësinë, por ka marrë rolin e shtetit rebel në përballje me tarifat tregtare të Donald Trump.
Si ekonomia më e madhe dhe më e populluar në SHBA, Kalifornia është bërë e para që sfidon zyrtarisht strategjinë tarifore të presidentit.
Të mërkurën, Guvernatori Gavin Newsom dhe Prokurori i Përgjithshëm Rob Bonta dorëzuan një padi në Gjykatën Federale të Distriktit Verior, duke kërkuar ndalimin e menjëhershëm të tarifave që Trump ka vendosur kundrejt partnerëve tregtarë ndërkombëtarë.
Ata e akuzojnë për tejkalim të kompetencave dhe për dëme të mëdha ekonomike, si për Kaliforninë, ashtu edhe për ekonominë amerikane në tërësi.
Në padi argumentohet se Trump nuk ka të drejtë të veprojë i vetëm në çështje tarifash dhe se nuk mund të përdorë Ligjin për Fuqitë Ekonomike Emergjente të vitit 1977 për të justifikuar veprimet e tij. Sipas Kushtetutës, vendimet për tarifa i takojnë Kongresit, jo Shtëpisë së Bardhë.
Në një deklaratë në rrjetin X, guvernatori Newsom shkroi:
“Donald Trump nuk ka autoritetin për të vendosur në mënyrë të njëanshme rritjen më të madhe të taksave të kohës sonë. Do ta çojmë në gjyq.” Ai shtoi se tarifat po rrisin çmimet, po kërcënojnë vendet e punës dhe po dëmtojnë rëndë familjet dhe bizneset kaliforniane.
Nga ana tjetër, Shtëpia e Bardhë reagoi përmes zëdhënësit Kush Desai, duke kritikuar guvernatorin që, sipas tyre, po e shpërdoron kohën me procese gjyqësore në vend që të merret me problemet e brendshme të Kalifornisë.
“Ne jemi të përkushtuar për të mbrojtur industrinë dhe punëtorët amerikanë, qoftë përmes tarifave apo përmes negociatave,” u shpreh Desai.
Kalifornia është thellësisht e varur nga tregtia ndërkombëtare. Vetëm vitin e kaluar, shteti eksportoi mallra me vlerë 183 miliardë dollarë dhe importoi 491 miliardë, kryesisht nga Kina, Meksika dhe Kanadaja.
Tarifat e reja po dëmtojnë këtë qarkullim, duke penguar rimëkëmbjen pas zjarreve shkatërruese në Los Angelos dhe duke prekur sektorë kyç si bujqësia, teknologjia dhe turizmi.
Në prapaskenë politike, Gavin Newsom po përgatitet për një të ardhme presidenciale. Kohët e fundit është përpjekur të ripozicionohet në spektrin politik, duke moderuar disa prej qëndrimeve të tij dhe duke hyrë në dialog me figura nga e djathta si Steve Bannon.
Por, në çështjen e tarifave, nuk ka lëvizur asnjë hap pas kjo është një betejë ekonomike dhe politike njëkohësisht.
Nëse padia e Kalifornisë fiton, ajo jo vetëm që do t’i japë fund tarifave të vendosura nga Trump, por do të krijojë një precedent që mund të kufizojë fuqinë presidenciale në politikën tregtare.
Për momentin, Kalifornia është në vijën e parë të rezistencës, duke vendosur veten si kundërpeshë ndaj një rikthimi të mundshëm të Trump-it në pushtet.
