Presidenti amerikan Donald Trump ka vendosur të shtyjë deri më 9 korrik afatin për arritjen e një marrëveshjeje tregtare me Bashkimin Europian, pasi paralajmëroi vendosjen e tarifave deri në 50% ndaj mallrave europiane.
Lëvizja vjen pas një bisede telefonike me Presidenten e Komisionit Europian, Ursula von der Leyen, e cila kërkoi më shumë kohë për të finalizuar një marrëveshje “të mirë”.
Fillimisht, Trump kishte shpallur një tarifë 20% ndaj shumicës së produkteve europiane, por më pas e zbriti në 10%, duke vendosur si afat datën 8 korrik.
Të premten, ai u shpreh i zhgënjyer me ritmin e negociatave dhe kërcënoi me rritje të tarifave në 50%, duke përmendur mungesën e përparimit.
“Ursula më tha se do të takohemi së shpejti për të parë nëse mund të arrijmë një zgjidhje,” tha Trump për mediat, duke shtuar në rrjetin Truth Social se ishte “privilegji im të shtyj afatin”.
Komisioneri europian për tregtinë, Maroš Šefčovič, konfirmoi se BE-ja mbetet e përkushtuar për një marrëveshje të drejtë dhe të ekuilibruar. Ai zhvilloi bisedime me përfaqësuesin amerikan të Tregtisë, Jamieson Greer, dhe Sekretarin e Tregtisë, Howard Lutnick, për të diskutuar hapat e mëtejshëm.
Trump ka qenë prej kohësh kritik ndaj balancës tregtare me BE-në, veçanërisht në sektorin e automobilave dhe produkteve bujqësore. Tarifat mbi çelikun dhe aluminin nga BE-ja, në masën 25%, mbeten ende në fuqi, pavarësisht pauzave në negociata.
Nga ana tjetër, BE-ja kishte përgatitur kundërmasa, përfshirë tarifa 25% ndaj mallrave amerikane me vlerë 18 miliardë euro, por i pezulloi për të shmangur përshkallëzimin.
Aktualisht, blloku po shqyrton masa shtesë për importe nga SHBA në vlerën deri në 95 miliardë euro. Franca dhe Gjermania kanë bërë thirrje për zgjidhje diplomatike, duke paralajmëruar se një përplasje e re tregtare do të dëmtonte rëndë ekonomitë e të dyja palëve.
