Tashmë që ka nisur bashkëjetesa me Covid-19, shqetësimi më i madh për çdo shoqëri mbetet ekonomia dhe kriza që shkaktoi pandemia këto muaj, efektet e së cilës sapo kanë nisur.
Qeveritë u kanë ardhur në ndihmë njerëzve duke miratuar të ashtuquajturat paketa financiare për të përballuar koronavirusin, dhe në vendin tonë deri tani janë miratuar 2 paketa.
Së fundmi, Banka e Shqipërisë është duke analizuar mundësinë e shtyrjes me një tjetër afat 3-mujor të pagesës së kësteve të kredive për bizneset që janë prekur më shumë nga kriza e pandemisë.
Në një intervistë për RTV Ora Guvernatori i Bankës së Shqipërisë, Gent Sejko tha se bankat duhet të bëjnë gjithçka në ndihmë të biznesit, por pa u thyer vetë.
Vendimi i parë është për shtyrje 3 mujore të kësteve të kredive, pasi jemi koshientë që aktivitetet u mbyllën. Janë 2 miliard euro këste në total të kredisë së shtyra, nga 4 miliardë në total. 50% e portofolit janë shtyrë. Po analizojmë situatën edhe një herë me bankat e nivelit të dytë për të parë nëse do të jetë e nevojshme një shtyrje. Natyrisht në favor të biznesit do të duhej të bëhej një shtyrje por prioritet është stabiliteti financiar. Duhet të jemi të sigurtë nëse marrim një vendim për shtyrje tjetër. Efektet financiare në institucionet financiare reflektohen në një kohë të mëparshme. Do të shohim në muajt e mëpasshëm që do të ketë përkeqësim në portofolin e kredive me probleme apo një rënie të kreditimit pavarësisht nga gjëndja e mirë që kanë bankat.
Kujtojmë se qeveria shqiptare ka marrë kredi nga FMN për të përballuar krizën ekonomike të shkaktuar nga pandemia, çka sjellë automatikisht edhe rritje të borxhit publik nga 65% që ishte para Covid-19.
Sipas Sejkos, kjo goditje e fortë ekonomike imponon mosrespektimin e nivelit të borxhit për një afat të përcaktuar kohe.
Bankat qëndrore në të gjithë botën kanë theksuar dhe kanë dalë nga kriteret e ruajtjes së nivelit të borxhit. Kjo goditje e fortë ekonomike imponon mosrespektimin e nivelit të borxhit për një afat të përcaktuar kohe. Qeveria shqiptare do t’i gjejë burimet e nevojshme përmes huasë. Bllokimi i ekonomisë ka sjellë që mos të ketë të ardhurat në buxhetin e shtetit. Të gjitha qeveritë janë të detyruara që të marrin borxh. Ky borxh do të menaxhohet në vitet e ardhshme për ta ulur atë. Banka Qëndrore ka në fakt objektiv politikën monetare. Politika fiskale menaxhohet nga qeveria. Niveli i borxhit do të rritet. Nuk ka një shifër ekzakte deri ku mund të mbajë borxhi i Shqipërisë por kjo do të varet nga mirëmanaxhimi i financave publike.
