Policia të arreston edhe nëse shkruan ndonjë mendim në Facebook. Deri këtu ka arritur kufizimi i lirisë së shprehjes në Shqipëri. Katë rinj që kanë bërë thirrje për protesta në Facebook janë proceduar penalisht. Dy të rinj janë arrestuar në flagrancë nga Policia e Durrësit, ndërsa 2 të tjerë janë proceduar penalisht pasi kanë bërë thirrje në rrjetet sociale dhe kanë organizuar protestë për vrasjen e Klodian Rashës nga një efektiv Policie.
Sipas njoftimit, shërbimet e Policisë arrestuan në flagrancë shtetasit Sh. M., 24 vjeç dhe A. B., 30 vjeç, si dhe proceduan penalisht shtetasit A. V., 20 vjeç dhe F. D., 23 vjeç, banues në Durrës, për veprat penale “Organizimi dhe pjesëmarrja në grumbullime e manifestime të paligjshme” dhe “Përhapja e informatave të rreme që ngjallin panik”.
Këta shtetas, edhe pse shërbimet e Policisë i kanë bërë të ditur që nuk lejohen tubimet dhe grumbullimet për shkak të situatës së krijuar nga pandemia, kanë vijuar të protestojnë. Materialet i kaluan Prokurorisë së Rrethit Gjyqësor Durrës, për veprime të mëtejshme.
Se ku e gjejnë të drejtën të procedojnë penalisht të rinjtë për një shënim në Facebook, këtë e dinë vetëm eprorët e Policisë të cilëve u është errësuar gjykimi nga urdhrat e paligjshëm të pushtetit.
/GazetaReforma.com/
