Forcat taebane janë pozicionuar në aeroportin e Kabulit dhe janë gati të marrin kontrollijn e plotë gjatë kësaj fundjave, sapo të jenë larguar forcat amerikane.
Një komandant i lartë tha se forcat talebane kishin marrë pjesën më të madhe të aeroportit, jo vetëm një pjesë të vogël ku amerikanët janë ende. Këta të fundit duhet të largohen brenda datës 31 gusht, afati i fundit i vendosur nga talebanët. Në aeroportin e Kabulit mijëra njerëz janë mbledhur në pritje për t’u larguar nga vendi.
Një zyrtar i dytë tha se forcat ishin gati për të marrë kontrollin e plotë, duke shtuar se është vetëm çështje kohe.
“Sapo amerikanët të largohen, ata thjesht duhet të na japin sinjalin dhe ne pastaj do të marrim përsipër. Kjo mund të bëhet që në fundjavë”, tha ai.
Reuters shkruan se asnjë koment nuk është bërë menjëherë nga zëdhënësit zyrtarë të talebanëve.
Ndërkohë, zëdhënësi i Pentagonit, John Kirby e ka mohuar që talebanët të kenë kontrollin, dhe ka thënë se ata nuk janë ende përgjegjës për asnjë nga portat dhe operacionet e aeroportit.
“Ata nuk janë përgjegjës për asnjë nga portat, nuk janë përgjegjës për asnjë nga operacionet e aeroportit. Kjo është ende nën kontrollin e ushtrisë amerikane,” tha Kirby.
