Talebanët kanë rënë dakord që afganët mund të largohen nga vendi edhe pas datës 31 gusht. Gjermania tha se ka marrë siguri nga një negociator taleban se afganët që kanë dokumentet e duhura do të lejohen të largohen nga Afganistani edhe pas afatit të tërheqjes së Shteteve të Bashkuara në fund të muajit.
I dërguari i Gjermanisë Markus Potzel ka bërë me dije në një postim në Twitter se ishte takuar me zëvendës -negociatorin taleban Sher Mohammad Abbas Stanikzai, i cili e kishte siguruar se afganët me dokumente ligjore do të vazhdojnë të kenë mundësinë të udhëtojnë me fluturime komerciale pas 31 gushtit.
Berlini ka thënë se operacioni aktual ushtarak i kryer nga aleatët e NATO -s për të evakuuar afganët që kanë nevojë për mbrojtje nuk mund të vazhdojë pasi amerikanët të tërhiqen.
Rreth 19,000 njerëz u evakuuan nga Kabuli të martën, duke rritur numrin e përgjithshëm të transportuar nga Afganistani që nga 14 gushti në 82,300, tha Shtëpia e Bardhë në një deklaratë.
Në 24 orët e fundit, 42 fluturime ushtarake amerikane dhe 48 fluturime të koalicionit ndihmuan në evakuimin e njerëzve nga kryeqyteti afgan në mes të kontrollit të talebanëve. Aktualisht ka rreth 10.000 njerëz në aeroport brenda perimetrit të sigurisë që presin nisjen nga Kabuli.
