Qeveria iu shtron rrugën për në Arbitrazh kompanive ndërkombëtare që operojnë në blloqet e naftës dhe gazit në Shqipëri. Me një ligj që ka 6 vjet që diskutohet, qeveria “Rama” kërkon që të zëvendësojë marrëveshjet e firmosur me to në kohën e Berishës dhe të Meksit.
Projektligji “Për regjimin fiskal në sektorin hidrokarbur” po diskutohet sot në Komisionin parlamentar për Veprimtaritë Prodhuese. Në seancë dëgjimore janë ftuar edhe kompanitë Shell dhe Anio Oil & gas.
Qëllimi i ligjit është të detyrojë kompanitë të [paguajnë më shumë taksa, pasi marrëveshjet i lejojnë një hapësirë të madhe të llogaritjes së shpenzimeve duke ulur fitimin i cili ndahet 50 me 50 me shtetin. Siç shprehen hartuesit e draftit, qeveria kërkon të reduktojë shmangien e taksave/tatimeve nga regjimi fiskal me normë tatimfitimi më të lartë (50%) tek regjimi i zakonshëm më i ulët (15%), nëpërmjet përfshirjes në këtë ligj të nënkontraktorëve, sipas rregullave që do të përcaktohen me vendim të Këshillit të Ministrave.
Më konkretisht propozohet që qeveria të llogarisë fitimin e tatueshëm të një personi nga një operacion i veçantë hidrokarbur për një periudhë tatimore, duke zbritur nga të ardhurat shpenzimet e zdritshme dhe humbjet e lejuara, por me kusht që zbritja të mos kalojë 85% të të ardhurave të operacionit.
Me asistencën e një grupi teknik nga departamenti i çështjeve fiskale në FMN, në qershor 2018, u arrit në një vlerësim teknik dhe krahasues të regjimit aktual fiskal të sektorit hidrokarbur. Ky grup vlerësoi regjimin dhe paraqiti alternativa për reforma, veçanërisht në drejtim të sigurimit të përfitimit më të madh për vendin nga burimet e veta hidrokarbure, por në të njëjtën kohë pa dekurajuar investimet në sektor.
Firmat që kryejnë operacionet hidrokarbure janë të autorizuar nga marrëveshje. Ndërsa projektligji paraqet një të drejtë për të zgjeruar (me vendim të Këshillit të Ministrave) funksionimin e regjimit fiskal tek nënkontraktorët në rrethana të caktuara. Kryesisht, këto rrethana përfshijnë raste, ku risku që të ketë abuzim me regjimin fiskal është më i madh.
Aktualisht, ligji i tatimit mbi fitimin për operacionet hidrokarbure aplikon normën e tatimfitimit mbi bazën e tatueshme të përcaktuar nga marrëveshja përkatëse hidrokarbure. Kjo do të thotë që baza e saktë e taksës ndryshon nga një marrëveshje tek tjetra.
Projektligji zhvendos edhe taksën e rentës minerare nga ligji për taksat kombëtare, pa ndryshuar normën në të cilën vendoset taksa.
Një arsyet e largimit të kanadezëve, të cilët e shitën Kompaninë Bankers, ka qenë mosmarrëveshja për taksat, ku rezultonte një mungesë prej 6oo milionë dollarësh. Cështja përfundoi në Arbitrazh, ku u zgjidh me “pajtim”.
/Gazeta Reforma/
