Kryetari i Partisë Social Demokrate, Dardan Molliqaj, ka bërë thirrje për protestë kundër themelimit të Asociacionit të Komunave me shumicë serbe në Kosovë. Në një postim në rrjetin social ‘Facebook’ teksa në Bruksel po zhvillohej takimi tre-palësh mes kryeministrit të Kosovës Albin Kurti, liderit serb Aleksandër Vuçiç dhe zyrtarëve evropianë Josep Borrell dhe Miroslav Lajçak, ai u ka bërë thirrje qytetarëve ta kundërshtojnë Asociacionin në rrugë, siç rëndom kanë bërë në të kaluarën kur Lëvizja Vetëvendosje, atëherë në opozitë organizonte protesta kundër këtij mekanizmi. Gjithashtu, Molliqaj tha se askush nuk ka mandat për Asociacionin, rezistenca kundër ishte shoqërore.
“Ju që mbushët sheshet me protesta dhe bllokuat Asociacionin; Ju që organizuat mijëra tubime kundër Asociacionit; Ju që shkelët me këmbë çdo pëllëmbë të Kosovës për t’i mbledhur 200 mijë nënshkrime; ju 200 mijë qytetarë që me vetëdije e vullnet firmosët kundër ndarjes etnike; ju që denjuat burgun dhe sollët protestën brenda Kuvendit. Ora kritike po vjen, marrëveshja që na pret në Bruksel është pa njohje dhe me Asociacion në qendër; aty është orari dhe mënyra e zbatimit”, shkroi ai.
Tashmë ka nisur takimi i përbashkët mes presidentit serb Aleksandër Vuçiçit dhe kryeministrit Albin Kurtit me përfaqësuesit e BE-së, Lajçak dhe Borell. Në fund, shefi i diplomacisë së BE-së Borrell do të dalë me një konferencë për mediat ku do të informojë mbi përfundimet e arritura gjatë taikmit me kreun e qeverisë së Kosovës dhe liderit serb. Sipas planit, nëse nuk arrihet marrëveshje mes Vuçiçit dhe Kurtit, do të mbahen sërish takime dypalëshe të liderëve për përfaqësuesit evropianë. Siç dihet, marrëveshja është e gatshme dhe se nuk do të diskutohet fare për përmbajtjen e saj. Kosovës dhe Serbisë i është kërkuar që ta pranojnë planin evropian, në të kundërtën, sipas ndërkombëtarëve, do të ketë pasoja për të dyja vendet, kurse në rast pranimi, sipas tyre, do të ketë benefite për të dyja vendet.
