Presidenti i Serbisë, Aleksandër Vuçiç zhvilloi sot një takim me përfaqësuesit e Listës Serbe me të cilët kanë biseduar për zgjedhjet lokale të 23 prillit në veri të Republikës së Kosovës. Vuçiç ka theksuar edhe njëherë se Lista serbe nuk do të marrë pjesë në zgjedhjet e shpallura për 23 prill, në katër komunat në veri të Kosovës, Mitrovicë e Veriut, Leposaviç, Zveçan dhe Zubin Potok.
Ai nuk dha detaje nga takimi, ndërsa njoftoi se i radhës do të mbahet në Rashkë, në jug të Serbisë ku theksoi se pritet që palët të dalin me konkluzione ose platformë të përbashkët sa i takon zgjedhjeve dhe jo vetëm. Ai tha se platforma do të përfshijë masa të sigurisë, politike, ekonomike dhe sociale për popullatën serbe në Kosovë, por pa dhënë detaje.
“Ne do të vazhdojmë punën në javën e ardhshme, kështu që mund të dalim me një qëndrim të përbashkët rreth të gjitha ngjarjeve. Do të bisedojmë në Rashkë herën tjetër, derisa të kemi pajtim për një platformë të përbashkët”, ka thënë Vuçiç.
Pse i refuzoi Lista Serbe zgjedhjet?
Më herët përfaqësuesit e Listës Serbe deklaruan se nuk do të marrin pjesë në zgjedhjet e ardhshme të jashtëzakonshme lokale në komunat në veri të Kosovës duke pretenduar se shkak për këtë vendim sipas tyre është bërë dhuna e vazhdueshme institucionale që zbaton regjimi i Albin Kurtit. Lista Serbe thekson se vendimi për të mos marrë pjesë në këto zgjedhje është marrë në përputhje me pikëpamjet e qytetarëve që ajo i përfaqëson me vite. Lidhur me këtë vendim më herët ka reaguar edhe kryeministri i Kosovës, Albin Kurti i cili në faqen e tij zyrtare në ‘Tëitter’ ka shkruar se refuzimi i Listës Serbe për të marrë pjesë në zgjedhjet lokale është shenjë e kontrollit të Beogradit mbi partinë dhe e ndërhyrjes së vazhdueshme në punët e brendshme të Kosovës.
Zgjedhjet në Veri të Kosovës më 23 Prill
Zgjedhjet e jashtëzakonshme për kryetarët e Mitrovicës së Veriut, Leposaviqit, Zveçanit dhe Zubin Potokut, janë shpallur për 23 prill, pasi kryetarët e Listës Serbe kanë dhënë dorëheqje për shkak të vendimit të Qeverisë së Kosovës për zbatimin e procesit të riregjistrimit të automjeteve nga targat serbe në targa të Kosovës. Zgjedhjet e paralajmëruara më parë, për 18 dhjetor të vitit të kaluar, u shtynë me kërkesë të bashkësisë ndërkombëtare. Afati për paraqitjen e kandidaturave ka skaduar më 22 mars. Komisioni Qendror i Zgjedhjeve i Kosovës ka bërë të ditur se nuk ka aplikime të reja, por vetëm u janë konfirmuar kandidaturat atyre që kanë aplikuar për pjesëmarrje në zgjedhjet e 18 dhjetorit. Kjo do të thotë se janë gjithsej 11 kandidatë nga katër subjekte politike, prej të cilëve vetëm dy janë të komunitetit serb.
