Në ditët e nxehta të verës, mbrojtja e syve nga rrezatimi ultraviolet është po aq e rëndësishme sa mbrojtja e lëkurës.
Por për të pasur efekt, syzet e diellit duhet të jenë të certifikuara dhe të pajisura me filtra mbrojtës.
Syzet që shiten në rrugë apo në vende të paautorizuara, shpeshherë janë jo vetëm të padobishme, por edhe të rrezikshme.
“Syzet pa filtra të certifikuar nuk ofrojnë aspak mbrojtje, përkundrazi, përforcojnë dëmtimin e syrit,” thotë mjekja okuliste Suzana Zhuka.
“Ato janë thjesht plastikë me ngjyrë, që shpesh përthithin më shumë dritë, duke zgjeruar bebëzën e syrit dhe lejuar rrezet UV të depërtojnë më thellë.”
Sipas saj, ekspozimi i syve ndaj rrezeve ultraviolet pa mbrojtje adekuate mund të shkaktojë dëmtime serioze si:
• Degjenerimi makular, që shkakton ndjeshmëri ekstreme ndaj dritës dhe humbje të shikimit qendror.
• Katarakta e parakohshme, që njihet si “plakje e syrit” dhe që normalisht shfaqet pas moshës 60 vjeç, por tani po haset edhe tek të rinjtë.
Okulistja thekson se kujdesi për sytë duhet të nisë që në fëmijëri.
“Që në momentin që një fëmijë del në diell, qoftë edhe në plazh, duhet të mbajë syze dielli me filtra mbrojtës. Ka vende në botë ku problemet si katarakta apo degjenerimi makular janë thuajse të panjohura, pikërisht sepse mbrojtja fillon që në moshën 2-3 vjeç.”
