Partizani dhe Dinamo barazuan 2-2 në derbin e luajtur në “Arenën e Demave”, takim ky i vlefshëm për raundin e katërt të Abissnet Superiore. Takimi ishte mjaft i bukur dhe i luftuar, dhe gjithcka u duk që në minutat e para. Kaluan vetëm katër minuta lojë dhe sfida u zhbllokua. Ishin dinamovitët që kaluan të parët në avantazh me anë të Mandela, por të kuqtë reaguan mjaft mirë, duke barazuar me anë të Bintsuka në minutën e 31-të, për të mbyllur pjesën e parë në barazpeshë 1-1.
Në pjesën e dytë, me një ritëm disi më të ulët, momentet më emocionuese mbërritën pas minutës së 90-të. Në momentin më të mirë të Dinamos, Rrapaj i dhuroi skuadrës së kuqe avantazhin, por në limite ishte Vila që vendosi edhe njëherë barazpeshën 2-2, për një mbyllje mjaft emocionuese të këtij derbi të parë të sezonit. Kështu, trajneri i Dinamos, Ilir Daja, debuton me barazim pas rikthimit të tij në superior.
Në takimin tjetër, që përmbylli javën e katërt të Superligës, Elbasani mposhti Laçin, duke u rikthyer te fitorja. Verdheblutë triumfuan 1-0 në “Elbasan Arena” dhe falë këtij trepikëshi ngjiten në krye të renditjes së “Abissnet Superiore” në kuotën e 7 pikëve, po aq sa Partizani, Vllaznia dhe Egnatia. Elbasani vuajti përballë Laçit të vendit të fundit, por në fund arriti që të marrë tre pikë të arta, falë golit të shënuar nga Gomesh në pjesën e dytë. Ky gol vulosi fatin e kësaj sfide dhe i jep një fitore të çmuar skuadrës së trajnerit Bordin.
